ԵՐԵՎԱՆ, 7 մայիսի — Sputnik. Լոնդոնի նոր քաղաքապետ, լեյբորիստ Սադիկ Խանը շաբաթ օրը երդում է տվել Լոնդոնի տաճարում բազմակրոն ծառայության ժամանակ:
«Իմ անունն է Սադիկ Խան, և ես Լոնդոնի քաղաքապետն եմ: Ես խոստանում եմ գլխավորել քաղաքի պատմության մեջ ամենաթափանցիկ և գործին նվիրված աշխատակազմը: Ես կլինեմ բոլոր լոնդոնցիների քաղաքապետը… Խոստանում եմ, որ հնարավոր ամեն ինչ կանեմ, որպեսզի ավելի լավը դարձնեմ քաղաքը»,- ասել է Խանը, ով Լոնդոնի պատմության մեջ առաջին մահմեդական քաղաքապետն է:
Խանը, ով Պակիստանից ներգաղթյալի որդի է, խոստովանել է, որ մինչև հիմա չի կարող հավատալ իր հաղթանակին և խոստացել է հասնել նրան, որ բոլոր լոնդոնցիներն ունենան այն հնարավորությունները, որոնք Մեծ Բրիտանիան տվել է իր ընտանիքին:
Արարողությանը ներկա են եղել նաև Լեյբորիստական կուսակցության նախկին առաջնորդ Էդ Միլիբանդը, ինչպես նաև Լոնդոնի տարբեր կրոնական համայնքների ներկայացուցիչներ:
Խանը հաղթանակ է տարել գլխավոր մրցակցի՝ միլիոնատեր Զաք Գոլդսմիթի նկատմամբ՝ ընտրություններում հավաքելով ձայների 57 տոկոսը: Գոլդսմիթին հաջողվել է հավաքել 43 տոկոս: Ընտրություններին ներկայանալու թիվը ռեկորդային է եղել և կազմել 45,6 տոկոս: Խանի համար քվեարկել է 1 միլիոն 310 հազար 143 մարդ, դա Լոնդոնի քաղաքապետերին վստահության ռեկորդային մանդատ է:
Պաշտոնապես Խանը կստանձնի պաշտոնը երկուշաբթի` տեղի ժամանակով 00:01-ին:
