ԵՐԵՎԱՆ, 6 մայիսի- Sputnik. Հայ ժողովուրդը ԽՍՀՄ-ի այլ ժողովուրդների հետ հսկայական ավանդ է ունեցել ֆաշիստական Գերմանիայի և նրա դաշնակիցների ջախջախման գործում, ՌԴ դեսպանատանը Հաղթանակի 71-րդ տարեդարձի կապակցությամբ կազմակերպված հանդիսավոր արարողության ժամանակ ասաց Հայաստանում Ռուսաստանի արտակարգ և լիազոր դեսպան Իվան Վոլինկինը։
«Հայ ժողովուրդը, ինչպես նաև ռուսները, ուկրաինացիները, բելառուսները, թուրքմենները, ղազախները, ուզբեկները, թաթարները և մեր երբեմնի ընդհանուր պետության մյուս ժողովուրդները հսկայական ավանդ են ունեցել Գերմանիայի և նրա դաշնակիցների ջախջախման մեջ»,- ասաց Վոլինկինը։ Նա նշեց, որ հայերն առաջին օրից պայքարել են պատերազմի ճակատներում և արժանապատվորեն կատարել հայրենիքի պաշտպանության սուրբ պարտքը։ Ուստի Երևանում, ինչպես նաև ողջ Հայաստանում մեծ հաղթանակին նվիրված այդքան շատ հուշարձաններ և հուշահամալիրներ կան։
Միաժամանակ Վոլինկինը նշեց, որ Գերմանիայի դեմ հաղթանակում զգալի ավանդ են ունեցել կոալիցիայի դաշնակիցները` ֆրանսիացիները, ամերիկացիները, անգլիացիները, լեհերը, հույները, Հարավսլավիայի ներկայացուցիչները և այլ ժողովուրդներ։ «Կորստի ընդհանուր ցավն ու հաղթանակի ընդհանուր ուրախությունը մեր ընդհանուր պատմությունն են` բարիդրացիական, հիրավի եղբայրական հարաբերությունների կապող օղակը։ Ուրախալի է տեսնել, որ չնայած պատմությունը կեղծելու բազմամյա տեղեկատվական քարոզարշավին, մենք ամեն տարի հավաքվում ենք միասին և նշանակալի միջոցառումներ անցկացնում»,- ասաց Վոլինկինը։ Ռուսաստանի դեսպանն առանձնացրեց Անմար կրակի մոտ ծաղկեպսակ դնելը, հայրենիքի համար զոհված միլիոնավոր հայրենակիցներին հարգանքի տուրք մատուցելը։
Նա նշեց, որ պետք է հնարավոր ամեն ինչ անել, որ ներկա սերնդի հայրերի և պապերի գործած սխրանքը հավերժ ապրի։
«Անցած տարիների ողբերգական իրադարձությունների կրկնություն թույլ տալ չի կարելի»,- ասաց Վոլինկինը։ Նրա խոսքով` այս հարցում մեծ պատասխանատվություն ունի երիտասարդությունը. «Հերոսական անցյալի մասին լուսավոր հիշատակը պետք է փոխանցվի սերնդեսերունդ, իսկ անցած պատերազմի դասերը պետք է կողմնորոշիչ դառնան այս հարցում»։
Հանդիսավոր ընդունելությանը ներկա էին առաջին տիկին Ռիտա Սարգսյանը, ԱԺ շարք պատգամավորներ, փոխխոսնակ Հերմինե Նաղդալյանը, Հայաստանի ՊՆ բարձրագույն ղեկավարությունը` նախարար Սեյրան Օհանյանի գլխավորությամբ, դեսպաններ և ռազմական կցորդներ, երկրի քաղաքական ու հասարակական գործիչներ։
