Լաուրա Սարգսյան, Sputnik.
Օպերայի պրեմիերան կայացել է անցած ամսվա սկզբին Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բեմում։ Թեև պրեմիերան կայացավ ղարաբաղյան հակամարտության թեժացման օրերին, և հասարակությանն ավելի հրատապ հարցեր էին հուզում, քան մշակութային իրադարձությունը, ու ռեժիսորն էլ չափազանց քննադատաբար մոտեցավ իր աշխատանքին, սակայն երևանյան հանդիսատեսը հիացմունքով ընդունեց «Նորման»։
«Ես մի քանի անգամ նշեցի, որ «Նորման» այդ տեսքով չի կարող ներկայացվել, որ դա օպերայի պարոդիա է։ Բոլորը միայն խոստացան, որ տեխնիկական հագեցվածության և դեկորացիաների հարցերը կլուծվեն պրեմիերայից առաջ»,- լրագրողների հետ զրույցում ասաց Բորիս Հայրապետյանը։
Հայրապետյանի խոսքով` նա մշտապես շփվել է օպերային թատրոնի ղեկավարության հետ, նրանք էլ խոստացել են, որ ամեն ինչ ժամանակին կարվի։ Ժամանակն անցել է, և եկել է պրեմիերայի օրը։
Հայրապետյանը բացատրեց, որ օպերան բեմադրվել է հովանավորների միջոցներով, և օպերան պետք էր բեմադրել ժամանակին։ Այլ հարց է, թե ինչ մակարդակով։
Միաժամանակ նա հայտնեց, որ երկու նամակ է ուղարկել մշակույթի նախարար Հասմիկ Պողոսյանին` խնդրելով «Նորման» հանել խաղացանկից ։
«Այդ ներկայացման ժամանակակից լեզուն յուրացնելու համար բարձրագույն մակարդակի ընկալում և ստեղծագործական ու վարչական կարգուկանոն է պետք։ Այդ գործոնների բացակայության դեպքում միայն մի բան է մնում` հանել «Նորման» խաղացանկից, ինչի համար ես կրկին խնդրում եմ Ձեզ` Հասմիկ Ստեփանովնա»,- ասվում է մշակույթի նախարարին ուղղված նամակում։
Իրավիճակը պարզաբանելու համար մենք կապ հաստատեցինք նաև Հայաստանի մշակույթի նախարարության հետ, և մեզ պատասխանեցին, որ նամակը կուսումնասիրեն, որից հետո մշակույթի նախարարը կհանդիպի հեղինակի հետ։
Սպենդիարյանի անվան օպերայի և բալետի գեղարվեստական ղեկավարի պաշտոնակատար Կարեն Շահինյանն իր հերթին Sputnik Արմենիայի թղթակցի հետ զրույցում ասաց, որ «Հայրապետյանը ժամանել է Հայաստան և որոշել է անուն հանել, բայց արդյունքում սև PR է ստացվել»։
Նա նաև նշեց, որ օպերային թատրոնի գեղարվեստական անձնակազմը հաստատել է «Նորման», և եթե այն վատ բեմադրված լիներ, ապա պրեմիերան չէր կայանա։
