ԵՐԵՎԱՆ, 6 մայիսի — Sputnik. Գոհար Սարգսյան. Ռազմական բժիշկներից երկուսը ներկա չէին միջոցառմանը, քանի որ իրենց մասնագիտական պարտքն էին կատարում Լեռնային Ղարաբաղում։ Հատուկ ընդգծվեց ռազմական բժիշկների դերը. նրանք միանգամից երկու երդում են տալիս` զինվորի ու բժշկի։
«Ես, գլուխ խոնարհելով մեր նահատակված զինվորների առաջ, մեր վիրավոր զինվորներին այսօր ապաքինում եմ ցանկանում։ Նրանց տոկուն աչքերում այս օրերին տեսել եմ միայն մեկ ցանկություն` արագ վերադառնալ շարք, արագ վերադառնալ խրամատ և անառիկ պահել հայրենի սահմանները, մեր երեխաների անդորրը, մեր արժանապատվությունը։ Ես շնորհակալություն եմ հայտնում նաև մեր բժիշկներին, ովքեր այս օրերին զինվոր են դարձել»,-ասաց առողջապահության նախարար Արմեն Մուրադյանը։
Sputnik Արմենիայի թղթակիցը զրուցել է քառօրյա պատերազմին հատուկ խիզախություն ցուցաբերած զինվորների և ռազմական բժիշկների հետ։ Վերջինները պատմեցին, թե հայ զինվորի ինչ կերպար են իրենց համար բացահայտել և որքան հպարտ են նրանցով։ Իսկ զինվորները հաստատեցին, որ ապաքինվելուն պես վերադառնալու են ծառայության, քանի որ կիսատ թողած գործ ունեն։
