Լաուրա Սարգսյան, Sputnik.
«Գաֆէսճեան» արվեստի կենտրոնի հանդիսությունների դահլիճը մարդաշատ է։ Երեկոյի հյուրերն ու լրագրողները հավաքվել են դահլիճի մի հատվածում։
Այդտեղ են ուղղված նաև տեսախցիկները, քանի որ այնտեղ հեռահար մոնտաժի հիմնադիր Արտավազդ Փելեշյանը ձեռքի դանդաղ շարժումներով մակագրում է «Դրոշմման ժամանակը» գիրքը։
«Նա ինքն է մոնտաժել իր գիրքը։ Այն ամբողջովին նրա գաղափարն է, մենք պարզապես այն կյանքի ենք կոչել», — Sputnik Արմենիայի թղթակցի հետ զրույցում ասաց Հայաստանի մշակույթի նախարար Հասմիկ Պողոսյանը։
Նրա խոսքով` ինչպես Փելեշյանի ֆիլմերն, այնպես էլ գրքին անհրաժեշտ է անդրադառնալ մի քանի անգամ` ստեղծագործությունն ամբողջությամբ հասկանալու համար։ Նախարարը խոստովանեց, որ մաեստրոյի ստեղծած ֆիլմերից ինքն ամենաշատը սիրում է «Տարվա եղանակները»։
Հյուրերը զբաղեցրին իրենց տեղերը։ Հանդիսության հերոսն, ըստ ավանդույթի, նստած էր իր կնոջ կողքին։ Յուրաքանչյուրի սեղանին դրված էր Փելեշյանի երկհատորյակը, իսկ էկրանին այդ ժամանակ ցուցադրվում էր «Օրդֆիլմ» ընկերության հիմնադիր, ռեժիսոր Հայկ Օրդյանի «Կինոպոետը. Արտավազդ Փելեշյան» ֆիլմը։
Ֆիլմում ներկայացված է Լոռվա փոքրիկ «Փելեշի» (այսպես էին նրան անվանում մանուկ հասակում) անցած ճանապարհը, ինչպես նաև նրա և հայտնի հայ ռեժիսոր Սերգեյ Փարաջանովի ընկերության պատմությունը։ Դեռ կյանքի օրոք Փարաջանովը Փելեշյանին հանճար էր կոչել, իսկ նրա հեռահար մոնտաժը մինչ օրս ուսումնասիրում են աշխարհի տարբեր բուհերում։
«Ես շատ եմ սիրում Փելեշյանի ֆիլմերը և չեմ կարող որևէ մեկն առանձնացնել։ Առաջին ֆիլմը, որը ես տեսել եմ, «Սկիզբն» էր։ Դա ռեժիսորի ավարտական աշխատանքն է, որը «Խորհրդային կինո» փառատոնի շրջանակում ուղարկվել էր ԱՄՆ ցուցադրության» — Sputnik Արմենիայի թղթակցի հետ զրույցում ասաց կոմպոզիտոր Տիգրան Մանսուրյանը։
Ինքը` Փելեշյանը, կինոյի մասին խոսելիս նշում է, որ «այն ծնվել է արվեստի մյուս բոլոր տեսակներից առաջ, սակայն տեխնիկական առումով ի հայտ է եկել արվեստի բոլոր տեսակներից հետո»։ Մաեստրոն ամենահզոր երևույթներից է համարում ժամանակը, որն անհաղթ է «այնպիսի փոքր մարդու համար, ինչպիսին Փելեշյանն է»։
«Ես խնայում եմ հանդիսատեսի ժամանակը։ Չէ՞ որ այն հզոր և արժեքավոր երևույթ է»։
Փելեշյանը ծրագրում է մարդու կյանքի պատմությունը ներկայացնող «Հոմո սափիենս» վերնագրով իր առաջին լիամետրաժ ֆիլմը նկարահանել։
