ԵՐԵՎԱՆ, 5 մայիսի — Sputnik, Անի Լիպարիտյան. Սուրբ Հովհաննեսի անվան Կամերային երգչախմբի փորձերն անցկացվում են Կոմիտասի անվան թանգարան-ինստիտուտում։ Երաժիշտները ծանոթացան թանգարանի ցուցանմուշներին և լսեցին թանգարանի աշխատակցի պատմությունը մեծ Կոմիտասի մասին։
Հայերենը շատ բարդ լեզու է, սակայն Սուրբ Հովհաննեսի անվան կամերային երգչախմբի շվեդ երգիչները կարճ ժամանակում կարողացան հաղթահարել այն և սովորել Կոմիտասի ստեղծագործությունները։
«Բավական դժվար էր հաղթահարել հայերենը, սակայն հաշվի առնելով, որ շվեդերենը նույնպես բարդ լեզու է, երգիչները կարողացան սովորել այն։ Մեզ շատ օգնեցին Հայաստանի գործընկերներն, ովքեր նախօրոք ուղարկել էին ձայնագրությունները, որպեսզի մենք կարողանայինք սովորել ճիշտ արտասանությունը», — Sputnik Արմենիային ասաց Սուրբ Հովհաննեսի անվան Կամերային երգչախմբի գեղարվեստական ղեկավար և դիրիժոր Կարին Օլդգրինը։
Օլդգրինը նշեց, որ երգչախումբը միշտ փորձում է կատարել ստեղծագործությունները բնօրինակի լեզվով, և քանի որ կոլեկտիվը հաճախ է կատարում աշխարհի տարբեր ժողովուրդների ստեղծագործություններ, ապա նրանք երգում են, մասնավորապես, եբրայերեն, ֆիլիպիներեն, չինարեն, սկանդինավյան բոլոր լեզուներով։
Շվեդական երգչախմբում տարբեր մասնագիտության տեր մարդիկ են, սակայն դա չի խանգարում նրանց ներդաշնակ կատարում ներկայացնել, ապահովել համաժամանակություն և հնչողության գեղեցկություն։
«Ես կարծում եմ, որ կարևոր չէ, թե դու պրոֆեսիոնալ երաժիշտ ես, թե այլ մասնագիտության տեր մարդ։ Ամենակարևորը, որ դու ամեն դեպքում անհատականություն ես։ Մի կողմից` դու անհատ կատարող ես, մյուս կողմից` երգչախմբում դու որոշակի դեր ես կատարում` ստեղծում ես ընդհանուր երաժշտության ձև և պատկեր», — ասաց զրուցակիցը Sputnik Արմենիային։
Օլդգրինը նաև նշեց, որ երգչախումբն ապագայում կկատարի հայ մյուս կոմպոզիտորների ստեղծագործությունները ևս։
«Այս շրջագայության ժամանակ մենք ցանկանում ենք հայ ունկնդրին ծանոթացնել սկանդինավյան երաժշտության հետ, ինչպես նաև հաղորդակից լինել Հայաստանի երաժշտական մշակույթին», — ասաց դիրիժորը։
Օլդգրինի խոսքով` Հայաստանը մի երկիր է, որը հայտնի է իր երաժշտական ավանդույթներով, այդ իսկ պատճառով հետաքրքիր է ցանկացած երաժշտի։
Հայաստան գալու որոշումը կայացվել է «Հայաստանի փոքրիկ երգիչներ» հայկական երգչախմբի գեղարվեստական ղեկավար Տիգրան Հեքեքյանի հետ ծանոթանալուց հետո։ Երգչախումբը հյուրախաղերով մեկ տարի առաջ գտնվում էր Շվեդիայում։
«Այն ժամանակ մեր դիրիժորը ծանոթացավ երգչախմբի երկու անդամների հետ, նրանք հյուրընկալվել էին նրա տանը։ Եվ այսպես մեր երգչախմբային ճանապարհորդությունը մեզ Երևան բերեց», — պատմեց Սուրբ Հովհաննեսի անվան Կամերային երգչախմբի երգիչ և մենեջեր Սերգեյ Ռյուդերհոլմը։
Երգչախումբը ծրագրում է հանդես գալ նաև «Սպեղանի» համույթի և հոգևոր երաժշտության արական երգչախմբի հետ։
«Մեզ համար մեծ պատիվ է Հայաստանի հոգևոր կենտրոնում` Էջմիածնում ելույթ ունենալը», — ասաց Սերգեյը։
Նա ավելացրեց, որ երգչախմբի ներկայացուցիչները ցանկություն ունեն լինել Հայաստանի ամենագեղեցիկ վայրերում, այցելել Սևան, Գեղարդ և ոչ միայն։ Նրանք կծանոթանան ոչ միայն երաժշտական մշակույթին, այլև տեսարժան վայրերին և մշակույթին։
