ԵՐԵՎԱՆ, 5 մայիսի — Sputnik. Թուրքիայում սկսված պաշտոնանկությունները ոչ մի լավ բան չեն տա այդ երկրին, դա վերջն է, օղակն այնքան է սեղմվել, որ նախագահ Ռեջեփ Թայիպ Էրդողանը սկսում է յուրայիններին ազատել, գտնում է Արագած Ախոյանը։
ԶԼՄ-ները հայտնում էին, որ Թուրքիայի վարչապետ Ահմեդ Դավութօղլուն հրաժարականի մասին հայտարարի մայիսի 5-ին։
Ըստ Ախոյանի` արդեն իսկ շրջանառվում է վարչապետի երկու թեկնածուի անուն` Բինալի Յըլդըրըմ` կապի և տրանսպորտի նախարար, և Բերաթ Ալբայրաք, ով էրդողանի փեսան է և էներգետիկայի նախարարը։
«Էրդողանին պետք է մարդ, որը կծռվի այնպես, ինչպես ինքը կթելադրի։ Յըլդըրըմն իրենից ոչինչ չի ներկայացնում, Էրդողանը ինչպես ասի, նա այդպես էլ անելու է։ Դե, երկրորդն էլ Էրդողանի փեսան է։ Եվ այս վիճակը տանում է դեպի ֆեոդալիզմ, ինչը խոսում է Թուրքիայի օրեցօր թուլացման մասին, այսինքն` դեմոկրատիայի, որևէ փոփոխության մասին այլևս խոսել չի կարելի
Թուրքիայի պարագայում»,- ընդգծեց Ախոյանը։
Պատգամավորի կարծիքով` Թուրքիայի խորհրդարանում ծեծկռտուքները, այդ երկրում գրանցվող անօրինականությունները խոսում են մի փաստի մասին` արդեն մի կողմ է դրվել ամեն ինչ` բարոյականությունը, սահմանադրությունը, և անցում է կատարվել հարցերի ուժային լուծմանը։
Ախոյանը կարծում է, որ այս փոփոխությունները Թուրքիային ոչ մի լավ բան չեն տա։ Նա հիշեցրեց, որ Էրդողանը պայքարեց գյուլենիստների դեմ, հետո քրդական հարցը բարձրացավ, որը տարավ փաստացի քաղաքացիական պատերազմի, այնուհետև Էրդողանը պատգամնավորներին է զրկում անձեռնմխելիությունից։ Ի վերջո, ըստ Ախոյանի, Թուրքիան շատ լուրջ խնդիրների առջև է կանգնելու։
