ԵՐԵՎԱՆ, 5 մայիսի — Sputnik. Եղանակն անկայուն է լինելու օրվա երկրորդ կեսին, այսինքն՝ օրվա առաջին կեսին հիմնականում կլինի քիչ ամպամած և առանց տեղումների եղանակ, իսկ երեկոյան ժամերին շրջանների զգալի մասում սպասվում է անձրև և ամպրոպ, մայիսի 6-7-ին և 10-ին առանձին հատվածներում նաև կարկուտ, ամպրոպի ժամանակ պետք է սպասել նաև քամու ուժգնացման՝ 15-20մ/վրկ: Այս մասին հայտնում է ՀՀ ԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը։
Օդի ջերմաստիճանը մայիսի 6-7-ին կնվազի 3-4 աստիճանով: Եթե այսօր Երևանում կգրանցվի 25-26 աստիճան տաքություն, ապա մայիսի 6-ին ջերմաստիճանը չի գերազանցի 24 աստիճանը, իսկ 7-ին՝ 22 աստիճանը, և կմնա անփոփոխ մինչև մայիսի 10-ը:
