ԵՐԵՎԱՆ, 5 մայիսի — Sputnik. Անդրադառնալով ՌԴ ԱԳ նախարար Սերգեյ Լավրովի երեկվա հայտարարությանը, Շավարշ Քոչարյանն ասաց, որ դրանում կան հատվածներ, որոնք շատ հստակ են։
«Առաջինը` որ այլընտրանք չկա խաղաղ կարգավորմանը, որ պետք է ամրապնդվի կրակի դադարեցման ռեժիմը»,- ասաց Քոչարյանը` ընդգծելով, որ այս տեսակետը կիսում են նաև Հայաստանի իշխանությունները։ Իսկ ինչ վերաբերում է Արցախի Հանրապետությունը ճանաչելու խնդրին, այս հարցում պաշտոնական Երևանն իր դիրքորոշումն ունի:
«Եթե Ադրբեջանը փորձի խուսափել այս զինադադարի հաստատման ռեժիմից և նոր ագրեսիա ծավալի, ապա այդ հարցը միանշանակ կմտնի օրակարգ»,- ասաց Քոչարյանը։
Այսօր կառավարությունում էր նաև «Արցախի ճանաչման մասին» օրենքի նախագծի համահեղինակ ԱԺ պատգամավոր Զարուհի Փոստանջյանը, ով Sputnik Արմենիայի հետ զրույցում օրինագծի ընդունումը կառավարության կողմից դրական առաջընթաց որակեց։
«Մենք այսօր պետականության կայացման և գործոնը լինելու խնդիր ունենք, և հենց մենք պետք է այդ մասին հայտարարենք, հռչակենք, ճանաչենք, որովհետև ամբողջ տարածաշրջանի քաղաքական քարտեզը փոփոխության է ենթարկվում»,- ասաց պատգամավորը։
Կառավարության հաստատած օրինագիծն առաջիկայում կներկայացվի ԱԺ, որտեղ, պատգամավորի խոսքով, հայտնի կդառնա նաև իր գործընկերների տրամադրվածությունը ԼՂ ճանաչման վերաբերյալ։ Այդուհանդերձ, կառավարության որոշումը, նրա համոզմամբ, որոշակի ազդեցություն կունենա նաև քաղաքական ուժերի դիրքորոշման վրա։
Հարցին, թե արդյո՞ք ԼՂ անկախության ճանաչումը Ադրբեջանի կողմից նոր ագրեսիա չի հրահրի, Զարուհի Փոստանջյանը պատասխանեց, որ ճանաչումը, հակառակը` կանխելու է նոր խնդիրները։
«Ագրեսիան դրանով պայմանավորված չէ։ Ապրիլյան իրադարձություններն ապացուցեցին, որ ագրեսիան Ադրբեջանի օրակարգի բաղկացուցիչ մասն է»,- ասաց Զարուհի Փոստանջյանը` փաստելով, որ եթե ագրեսիան արդեն կիրառվում է և մարդկության դեմ հանցագործություններ են կատարվում, ապա խոսել բանակցությունների մասին, ուղղակի ծաղր է ողջ մարդկության նկատմամբ։
Հիշեցնենք, որ ՀՀ կառավարությունն այսօր հաստատեց ԱԺ պատգամավորներ Զարուհի Փոստանջյանի և Հրանտ Բագրատյանի հեղինակած` ԼՂՀ ճանաչման մասին օրենքի նախագիծը։ Օրինագծի հետագա ճակատագիրը կորոշվի արդեն ԱԺ-ում։
