ԵՐԵՎԱՆ, 4 մայիսի — Sputnik. Մոսկվան համարում է, որ գլխավորը հրադադարի պահպանման գործուն մեխանիզմներ մշակելն է, ՌԻԱ Նովոստիին տված հարցազրույցում ասել է ՌԴ արտգործնախարար Սերգեյ Լավրովը:
«Իհարկե, հիմա ամենակարևորը նոր զոհերից խուսափելն է և հրադադարի խախտումները կանխելը, այդ նպատակով գործուն միջոցներ, գործուն մեխանիզմներ մշակելը»,- ասաց նա։
Լավրովի խոսքով` դրա տակ «ստորագրել են Հայաստանի և Ադրբեջանի նախագահները դեռ հինգ տարի առաջ, երբ նրանց հետ հանդիպում էր կազմակերպել այն ժամանակվա մեր նախագահը` Դմիտրի Մեդվեդևը»։
«Եվ նրանք կողմ արտահայտվեցին միջադեպերի քննության մեխանիզմների ստեղծմանը, վստահության ամրապնդմանը։ Հանձնարարեցին ԵԱՀԿ-ին զբաղվել այդ հարցով, և ԵԱՀԿ-ի ներկայացուցիչները մի քանի տարբերակով նախագիծ նեկայացրին։ Սակայն, ցավոք, 2012 թվականին այդ փուլից այն կողմ հնարավոր չեղավ անցնել։ Բայց այսօր մենք ցանկանում ենք, որ կողմերը վերադառնան այդ կետին, ԵԱՀԿ-ի գերմանական ներկայացուցչությունն ուզում է ակտիվություն դրսևորել, և մենք խրախուսում ենք նրանց ցանկությունը»,- ասել է Ռուսաստանի արտգործնախարարը։
