ԵՐԵՎԱՆ, 4 մայիսի — Sputnik. Արտոնագիր ստանալու համար տաքսիստներից գանձված միջոցները, ինչպես նաև տուգանքները պետք է ուղղվեն ռազմական կարիքներին, չորեքշաբթի լրագրողներին ասաց «Վարորդների պաշտպանության լիգայի» նախագահ Տիգրան Հովհաննիսյանը։
«Դեռ 1,5 տարի առաջ, երբ բարձրացավ լիցենզավորման նոր ալիքը, ես հանդիպեցի Ազգային ժողովի բոլոր խմբակցությունների` գեներալ Մանվել Գրիգորյանի, «Արաբո», «Ապարան» ջոկատների հրամանատարների հետ։ Նրանք բոլորը համաձայն են, որ տաքսիստներից գանձված հարկերը տրամադրվեն ազատամարտիկների սոցիալական կարիքներին»,- ասաց Հովհաննիսյանը։
Այժմ նրա խոսքով` իրենք առաջարկում են ուղղել այդ միջոցները զենք և զինամթերք գնելուն։
Վճարների գումարն ավելացնելու և բարեխիղճ տաքսիստների հոգսը թեթևացնելու համար Հովհաննիսյանն առաջարկում է փոխել արտոնագրեր տրամադրելու կարգը, որը նրա կարծիքով գոյության 1,5 տարվա ընթացքում ապացուցել է իր անարդյունավետությունը։ Նրա խոսքով` շուրջ 5 հազար տաքսիստներ վճարումներ չեն կատարում, և ողջ բեռն ընկնում է բարեխիղճ տաքսիստների վրա
Նա կոչ արեց տրանսպորտի նախարարությանը հաշվառել բոլոր տաքսիստներին, որոնց գործունեության թույլտվությունը կտրամադրի Ճանապարհային ոստիկանությունը։ Այսպիսով, կարելի է վերահսկել այդ ոլորտը։
Արտոնագրի համար ամսական 50 հազար դրամ վճարում կատարելու փոխարեն Հովհաննիսյանն առաջարկում է օրական վճարում կատարել, բայց միայն այն օրվա համար, երբ տաքսիստը կաշխատի։
Դրա համար պետք է նրանց հնարավորություն տալ հատուկ մեկօրյա կտրոններ գնել (կրպակներում և փոստային բաժանմունքներում)։ Մեկօրյա կտրոնի արժեքը Երևանում կարող է կազմել 6 հազար դրամ, իսկ մարզերում` 3 հազար դրամ։ ՃՈ-ն կստուգի դիմապակու վրա այդ կտրոնների առկայությունը։
Հովհաննիսյանի կարծիքով` այդ դեպքում վճարների արդյունավետությունը կավելանա 10 անգամ. եթե նախկինում հազար տաքսիստ վճարում էր ամսական 50 հազար դրամ (մյուս 5 հազարը խուսափում էին), ապա փորձագետի հաշվարկով` օրական 6 հազար դրամը կարող է վճարել շուրջ 50 հազար վարորդ։
Հովհաննիսյանի գնահատականներով` պետության ամսական եկամուտն այդ վճարների հաշվին կկազմի 300 մլն դրամ, նա առաջարկում է այդ միջոցներն ուղղել ռազմական կարիքներին։
Այդ առաջարկները նա ներկայացրել է պաշտպանության փոխնախարարի և ՊՆ այլ բարձրաստիճան անձանց ներկայությամբ, սակայն կոնկրետ որոշում դեռ չի ընդունվել։
