ԵՐԵՎԱՆ, 4 մայիսի — Sputmnik. «.հայ» դոմենի հեղինակները հայտնում են, որ հայատառ դոմեն ունենալու 150 հայտ արդեն ստացել են, որոնց կեսը` պետական մարմիններից։
Հայկական դոմենում կայք գրանցելու համար պետք է դիմել Հայաստանում նման ծառայություն մատուցող շուրջ 1 տասնյակ կազմակերպություններից մեկին, վճարել 10-50 հազար դրամ, իսկ կայքի սպասարկման ամսական գումարը չի գերազանցում 1000 դրամը։
Ծրագրի իրականացնող Կապի և տրանսպորտի նախարարի տեղակալ Գագիկ Թադևոսյանի համոզմամբ, հայկական դոմենի առկայությունը կնպաստի Հայաստան- սփյուռք կապերի ամրապնդմանն ու հայապահպանությանը։
«Լատինատառ ու կիրիլիկ գոտիներին զուգահեռ հայատառ ինֆորմացիան կլինի համաշխարհային ցանցում»,- ասաց փոխնախարարը` նշելով, որ ցանկության դեպքում նույն կայքը, հայատառ հասցեին զուգահեռ, կարող է ունենալ նաև լատինատառը` չհրաժարվելով արդեն գործող կամ կայացած հասցեից։
Իսկ հայատառ տառատեսակների հեղինակ Ռուբեն Թարումյանը կարծում է, որ հայ օգտատերերին հայկական այբուբենից բացի, այլ տառատեսակներ այսուհետ ընդհանրապես պետք չեն։
Հայաստանում կիրառվող լատինատառ «.am» դոմենն այսուհետ ևս կշարունակի իր աշխատանքը։ Իսկ ինչ վերաբերում է անվտանգությանը, ծրագրի հեղինակները վստահեցրին, որ դրանք երկուսն էլ հավասարաչափ պաշտպանված են և հսկվում են ԱԱԾ մարմինների կողմից։
«Ինտերնետ հանրություն» ՀԿ փոխնախագահ Գրիգոր Սաղյանը վստահ է, որ հայկական դոմենի ստեղծման փորձն առաջիկայում ցանկալի արդյունք կտա, և որպես օրինակ նշում է Բելառուսի փորձը։ Անցյալ տարի ազգային դոմեն ստեղծած Բելառուսում, նրա խոսքով, «. бел» գոտում արդեն 10 000-ից ավելի գրանցումներ կան։
Թե քանի գրանցում կունենա հայկական դոմենը մեկ տարի անց, ծրագրի հեղինակները դժվարացան կանխատեսել, բայց վստահեցրին, որ ինտերնետային հասցեն ամբողջությամբ մեսրոպատառ հայերենով գրելու ցանկություն կունենան շատերը։
