ԵՐԵՎԱՆ, 4 մայիսի — Sputnik. Կառլեն Խաչատրյանը հայտնեց, որ հանրային ծառայությունները կարգավորող հանձնաժողովը սկսել է էլեկտրաէներգիայի սակագնի վերանայման գործընթացը։
«Այսօր մեր էլեկտրաէներգիայի սակագինը ձևավորվում է տարբեր աղբյուրներից գոյացող էլեկտրաէներգիայի սակագների հաշվին` ատոմակայան, ջէկեր, հէկեր և այլն։ Ամենաէժան էլեկտրաէներգիան ստացվում է ատոմակայանից, իսկ ամենաթանկը` ջէկերից։ Քանի որ ջէկերը գազի հիման վրա են էլեկտրաէներգիա արտադրում, հասկանալի է, որ գազի սակագնի նվազմանը զուգահեռ կիջնի նաև էլեկտրաէներգիայի սակագինը»,-ասաց Կառլեն Խաչատրյանը։
Ըստ Խաչատրյանի` գազի գնի իջեցումը սպառողական ապրանքների գնագոյացման վրա լուրջ ազդեցություն չի թողնի։ Խոսքը հացի, կաթնամթերքի, մսամթերքի մասին է։
«Քիչ թե շատ շոշափելի արդյունք կունենանք շինարարության և ջերմոցային տնտեսությունների գծով, որովհետև այնտեղ է, որ գազի տեսակարար կշիռն ընդհանուր ինքնարժեքում բավականին շոշափելի է»,-ասաց նա։
Հիշեցնենք, որ «Գազպրոմ Արմենիա» ընկերությունը դիմել է Հանրային ծառայությունները կարգավորող հանձնաժողով` առաջարկելով 9.3 դրամով իջեցնել 1 խմ գազի սակագինը։ Եթե այս պահին մենք վճարում ենք 1 խմ-ի համար 156, ապա այդ դեպքում կվճարենք 146.7 դրամ։
