ԵՐԵՎԱՆ, 4 մայիսի — Sputnik. Երևանյան համաժողովի կազմակերպիչների դիտարկմամբ, աշխարհում արդեն տեղի է ունեցել ինովացիոն 3 հեղափոխություն. 1-ինը` 1860-ականներին, երբ հայտնագործվել է շոգեքարշը, 2-րդը` 1900-ականների շեմին` էլեկտրաէներգիայի և ներքին այրման շարժիչի գյուտի հետ, 3-րդը` 1960թ-ին, երբ հայտնագործվել է առաջին հաշվիչ մեքենան։ Դե իսկ 4-րդ հեղափոխությունը, որին մասնակցելու հայտ է ներկայացրել նաև Հայաստանը, նախանշված է 2016թ.-ից։ Թե որն է լինելու դարի հեղափոխական հայտնագործությունը, դեռ հայտնի չէ, բայց ՀՀ էկոնոմիկայի նախարար Արծվիկ Մինասյանը հույս ունի, որ դրան մասնակցելու են նաև հայ մասնագետները։
«Հեռահաղորդակցության և ՏՏ ոլորտի արագ փոփոխությունները նաև արագ որոշումների կայացում են պահանջում։ Այս ոլորտը Հայաստանին ներկա մակարդակում անհրաժեշտ մակարդակի մրցունակություն է ապահովել, և պատահական չէ, որ Հայաստանը համարվում է այս տարածաշրջանի առաջամարտիկներից մեկը»,- ասաց Արծվիկ Մինասյանը։
Տեղեկատվական տեխնոլոգիաների ոլորտը ՀՀ կառավարությունը դեռևս 2008թ.-ին է տնտեսության գերակա ճյուղ հռչակել է։ Որպես հեռահար նպատակ` մեր երկիրը պետք է դառնա տարածաշրջանի Սիլիկոնային հովիտը։ Sputnik Արմենիայի հարցին, թե որքանով է այս պահին իրատեսական այս նպատակը, Արծվիկ Մինասյանը պատասխանեց։
«Եթե պահենք այս տեմպը, վստահ եմ, որ տարածաշրջանում առաջնային դիրք կունենանք և կկարողանանք տնտեսական և հասարակական կյանքի մնացած բոլոր ոլորտներում ևս թելադրող դիրք ունենալ։ Սա մեր բնական և մրցակցային առավելությունն է»։
Ինչ վերաբերում է ինովացիոն տեխնոլոգիաները ռազմարդյունաբերության մեջ կիրառելուն, էկոնոմիկայի նախարարը վստահեցրեց, որ ռազմական արդյունաբերությունը ոլորտի առաջնահերթությունների թվում է, պարզապես արվածը միշտ չէ, որ կարելի է բարձրաձայնել։
Համաժողովին մասնակցելու համար Հայաստան ժամանած «Մայքրոսոֆթ» կորպորացիայի հանրային ոլորտի աշխատանքների տնօրեն Թրուդի Գրեյը, որ մի քանի անգամ մեր երկիր է այցելել նաև որպես զբոսաշրջիկ, հայ գործընկերներին խորհուրդ տվեց աշխարհին եռաչափ տարբերակով ներկայացնել Մատենադարանի թվայնացված արխիվները` վստահեցնելով, որ դրանք տեսնող ցանկացած ոք կցանկանա տեսնել Հայաստանը։
Ի դեպ, Մայքրոսոֆթը Հայաստանում նաև սեփական ծրագրերն ունի։ Համաշխարհային այդ կազմակերպության մասնագետների համոզմամբ մեր երկիրն անհրաժեշտ պոտենցիալ ունի։
«Եթե Հայաստանում առկա հմտությունները մենք փորձենք համադրել հայկական ձեռնարկատիրական ոգու հետ, ապա համոզված եմ` որոշ հաջողություն կունենանք»,- ասաց Թրուդի Գրեյը։
«Մայքրոսոֆթում» նաև ուսումնասիրել են Հայաստանի տեղեկատվական անվտանգության մակարդակը։ Արևելյան Եվրոպայում ծրագրերի անվտանգության պատասխանատու Ռոբերտ Կոսլայի խոսքով` մեր երկիրն այս առումով միջին մակարդակի վրա է։ Ըստ նրա` անվտանգության ապահովումը հատկապես կարևոր է ռազմական գործողությունների ընթացքում, երբ իրական պատերազմին զուգահեռ նաև կիբեռհարձակումներ են իրականացվում տվյալ երկրի վիրտուալ տիրույթի վրա։ Մասնագետի կարծիքով` Հայաստանում ՏՏ ոլորտում կատարված ներդրումներն անվտանգության տեսակետից պաշտպանված են բավարար չափով։
