ՀՀ նախագահի խոսնակ. ԼՂՀ-ն ճանաչելու լուրն առաջինը կհայտնի Հայաստանի նախագահը

ԵՐԵՎԱՆ, 3 մայիսի — Sputnik. ԼՂՀ-ն պաշտոնապես ճանաչելու դեպքում լուրն առաջինը կհայտնի Հայաստանի նախագահ Սերժ Սարգսյանը, այս մասին ասել է Հայաստանի նախագահի մամուլի քարտուղար Վլադիմիր Հակոբյանը, հայտնում է news.am-ը։

«Թող ոչ ոք չկասկածի, որ Լեռնային Ղարաբաղի Հանրապետությունը պաշտոնապես ճանաչելու դեպքում բոլորն այդ մասին առաջինը կլսեն Հայաստանի Հանրապետության նախագահ Սերժ Սարգսյանի շուրթերից»,- նշել է նա։

Հայաստանի նախագահի մամուլի քարտուղարն անդրադարձել է ԼՂՀ-ն ճանաչելու վերաբերյալ օրենքի նախագիծը ՀՀ կառավարության նիստի օրակարգում ներառելու շուրջ Ադրբեջանի նախագահի աշխատակազմի, Արտաքին գործերի նախարարության և այլ պաշտոնյաների հայտարարություններին:

«Ավաղ, Ադրբեջանում այնքան երկար են ապրել բռնապետության ներքո, որ արդեն անգամ իշխանության ամենաբարձր օղակներում են մոռացել, որ այլ երկրներում սովորաբար լինում են նաև բանտերից դուրս գտնվող մարդիկ, ովքեր ընդդիմադիր են, այլ երկրներում բանտերից դուրս գտնվող ընդդիմադիրները, պատկերացնու՞մ եք, իրավունք ունեն օրենսդրական նախաձեռնություններ առաջ քաշել և այլ երկրներում, օ՜ զարմանք, կառավարությունները պարտավոր են իրենց նիստերի օրակարգում ներառել ընդդիմադիրների նախաձեռնությունները և քննարկել դրանք:
Նրա խոսքով` այս պահին Հայաստանում հետևում են Ադրբեջանի բարձրաստիճան տարբեր պաշտոնյաների զառանցանք-հայտարարությունների շքերթին, որոնք զարմանքից բացի միայն զվարճանք կարող են առաջացնել:

«Տպավորություն է, թե Ադրբեջանում անգամ ժողովրդավարության մասին գրքերն են վերացել, որոնք կարելի է կարդալ ու տեղեկանալ»,- նշել է նա:

Հիշեցնենք, որ ԱԺ պատգամավորներ Զարուհի Փոստանջյանի և Հրանտ Բագրատյանի հեղինակած «Արցախի Հանրապետությունը ճանաչելու մասին» ՀՀ օրենքի նախագիծն ընդգրկվել է ՀՀ կառավարության մայիսի 5-ի օրակարգում։