ԵՐԵՎԱՆ, 3 մայիսի — Sputnik. ԼՂՀ անկախության ճանաչման շուրջ Հայաստանի խորհրդարանական ուժերի տեսակետները տարբեր են. ՀՅԴ-ն կարծում է, որ ժամանակը չէ, «Ժառանգությունը»` որ 25 տարով ուշացած է։ ՀՀ կառավարությունն այս հարցի մասին իր տեսակետը կհայտնի մայիսի 5-ի նիստում։
ՀՅԴ-ի կարծիքով` այսօր ԼՂՀ անկախությունը ճանաչելու ժամանակը չէ։ Այս մասին Sputnik Արմենիային ասաց ԱԺ ՀՅԴ խմբակցության քարտուղար Աղվան Վարդանյանը` հիշեցնելով, որ Դաշնակցությունը միշտ էլ այս տեսակետն է արտահայտել այդ հարցի վերաբերյալ։
«Ամեն անգամ, երբ այդ օրինագիծը մտել է խորհրդարան, մենք ասել ենք, որ ուղղակի հիմա նպատակահարմար չէ»,- հիշեցրեց Աղվան Վարդանյանը։
Ապրիլյան իրադարձությունները կուսակցության տեսակետը չեն փոխել։ Փոխարենը ՀՅԴ-ն անհրաժեշտ է համարում ՀՀ և ԼՂՀ միջև փոխօգնության համաձայնագրի նախապատրաստումը և ընդունումը։
«Այսօր օրակարգային հարց է փոխօգնության համաձայնագրի ստորագրումը»,- ասաց Աղվան Վարդանյանը։
Ի տարբերություն իր գործընկերոջ` նախագծի համահեղինակ, ԱԺ «Ժառանգություն» խմբակցության անդամ Զարուհի Փոստանջյանը կարծում է, որ ոչ միայն ժամանակն է ճանաչել Ղարաբաղի անկախությունը, այլև այն 25 տարով ուշացած է։
ԼՂՀ-ի ճանաչումն ու միջազգային ասպարեզում այդ պահանջով հանդես գալը օրինագծի համահեղինակը համարում է պատերազմի այլընտրանք։
«Հայաստանը, լինելով միջազգային իրավունքի սուբյեկտ, պարտավոր է ճանաչել ԼՂՀ անկախությունն ու ամեն ինչ անել, որպեսզի միջազգային հանրությունը նույնպես ճանաչի»,- նշեց նա։
Քաղաքական այլ ուժերի ներկայացուցիչներն ընդհանրապես հրաժարվեցին ԼՂ ճանաչման վերաբերյալ տեսակետ հայտնել` պատճառաբանելով, որ ծանոթ չեն ներկայացված օրինագծին։
Հիշեցնենք, որ ԱԺ պատգամավորներ Զարուհի Փոստանջյանի և Հրանտ Բագրատյանի հեղինակած «Արցախի Հանրապետությունը ճանաչելու մասին» ՀՀ օրենքի նախագիծն ընդգրկվել է ՀՀ կառավարության մայիսի 5-ի օրակարգում։
Նախագծի` կառավարության օրակարգում ընդգրկվելը Փոստանջյանն առաջին հերթին մեկնաբանեց կանոնակարգային պահանջով։ Իսկ թե ինչպիսին կլինի կառավարության եզրակացությունը, նախագծի համահեղինակը չցանկացավ կանխատեսում անել` առաջարկելով սպասել մինչև հինգշաբթի։
