ԵՐԵՎԱՆ, 3 մայիսի — Sputnik. «Արարատ-73» թիմի լեգենդար ֆուտբոլիստները հանդիպել են Հայաստանի ազգային օլիմպիական կոմիտեի նախագահ Գագիկ Ծառուկյանի հետ, հայտնում են ՀԱՕԿ լրատվության բաժնից:
ՀԱՕԿ նախագահը ֆուտբոլիստների հետ քննարկել է «Արարատ-73»-ի փառահեղ հաղթանակները հավերժացնող հուշարձանի կառուցման և տեղադրման մանրամասները:
Ֆուտբոլիստների հետ զրույցում Ծառուկյանը նշեց, որ ամեն ինչ պետք է լեգենդար ֆուտբոլիստների սրտով լինի: Որոշվեց, որ հուշարձանի բացումը տեղի կունենա ընթացիկ տարվա հոկտեմբերի 10-ին:
Հուշարձանի նախնական տեսքը պատրաստ է, մնում են հարդարման աշխատանքները ավարտին հասցնել և որոշել տեղադրման վայրը, որը ՀԱՕԿ նախագահը թողել է ֆուտբոլիստների հայեցողությանը:
Հիշեցնենք, որ 1973 թվականի հենց հոկտեմբերի 10-ին Մոսկվայի Լենինի անվան կենտրոնական ստադիոնում կայացավ Երևանի «Արարատի» և Կիևի «Դինամոյի» պատմական հանդիպումը, և երևանցիները հաղթեցին 2:1 հաշվով` նվաճելով Խորհրդային Միության բյուրեղապակյա գավաթը:
Այդ հանդիպումից օրեր անց Երևանի «Հրազդան» ստադիոնում կայացավ Երևանի «Արարատի» և ռուսական «Զենիթի» հանդիպումը, որում դաշտի տերերը հաղթեցին 3:2 հաշվով՝ նվաճելով նաև Խորհրդային Միության չեմպիոնի տիտղոսը:
