ԵՐԵՎԱՆ, 3 մայիսի- Sputnik. Բրազիլիան հույս ունի, որ ղարաբաղյան հակամարտությունը խաղաղ լուծում կստանա ԵԱՀԿ Մինսկի խմբի շրջանակում, լրագրողներին ասաց Հայաստանում Բրազիլիայի արտակարգ և լիազոր դեսպան Էդսոն Մարինյո Դուարտե Մոնտեյրոն։
«Մենք խաղաղ կարգավորում ենք ուզում։ Կարծում ենք, որ բանակցային գործընթացի համար պատասխանատու է Մինսկի խումբը, և հույս ունենք, որ հարցը կլուծվի հենց այդ ձևաչափով»,- ասաց Մոնտեյրոն։ Նրա խոսքով` հակամարտության թեժացումը, իհարկե, վշտացնում է, սակայն իրավիճակը շատ երերուն է, և Բրազիլիան չի կարող ընդգրկվել այդ հակամարտության լուծման գործում։
Մոնտեյրոն նաև մեջբերեց Հայաստանի արտգործնախարար Էդվարդ Նալբանդյանի խոսքն այն մասին, որ կարևոր են ոչ թե բանակցությունների ընթացքում հնչած հայտարարությունները, այլ` իրական գործողությունները։ «Դիվանագիտությունը հայտարարություններով հանդես գալը չէ։ Խնդիրն այն է, որ հարցը պետք է լուծել բանակցությունների օգնությամբ»,- ասաց Մոնտեյրոն։
