ԵՐԵՎԱՆ, 3 մայիսի — Sputnik. Հալաբյան փողոցում տեղի ունեցած պայթյունն իրարանցում առաջացրեց հասարակության մեջ։ Առաջին ժամերի կցկտուր տեղեկությունները` պայթյունի պատճառների ու զոհերի մասին, շատերին ստիպեցին տարբեր ենթադրություններ անել։ Անգամ ահաբեկչության վարկած հնչեց։ Ավելի ուշ ՀՀ իրավապահ մարմինները հերքեցին շրջանառվող բոլոր լուրերը, հստակեցրին զոհերի քանակը (2 զոհ) և վստահեցրին, որ պայթյունի համար հիմք է հանդիսացել կենցաղային դժգոհությունը։ Զոհերից մեկը պայթյունի ենթադրյալ մեղավորն է, իսկ մյու՞սը…
Մյուս զոհի վերաբերյալ պաշտոնական ու ոչ պաշտոնական տեղեկություններ այդպես էլ չհրապարակվեցին, իսկ հասարակությունը տեղեկացված չլինելու պատճառով սկսեց սովորության համաձայն լուրեր հորինել ինքնուրույն։ Իսկ հորինածի մեջ, ինչպես միշտ, ստի ու երևակայության չափաբաժինը շատ ավելի շատ էր, քան ճշմարտության։
Իրականում մյուս զոհը 37-ամյա տղամարդ է, ընտանիքի հայր, ատամնատեխնիկ, հարևանների ու բարեկամների խոսքով` «մեծատառով մարդ»։
Արմենի կինը` Կարինեն, մեզ հետ զրույցի ընթացքում չի կարողանում զսպել արցունքները։ Ասում է` հասարակության մեջ որոշ չարախոսներ եղան, որոնք գուցե չհասկանալով, բայց ամուսնուս անունը կապեցին պայթյունի մեղավորի հետ։
«Ուզում եմ, որ բոլորն իմանան`Արմենն անմեղ էր, ու նա զոհ դարձավ`անհայր թողնելով երկու անչափահաս դուստրերին։ Նա մեր տան, մեր երջանիկ ընտանիքի ամենագլխավոր մարդն էր։ Վիշտս մեծ է, անսահման մեծ»,- ասում է կինը և կրկին ու կրկին խնդրում շեշտել, որ ամուսնու անունն անբիծ է։
Արմեն Հովհաննիսյանի բարեկամուհին` Աիդա Հովհաննիսյանը նույնպես հազիվ է զսպում արցունքները, Sputnik Արմենիա ռադիոկայանի եթերում ցավով է խոսում տեղի ունեցածի ու Արմեն Մովսիսյանի մահվան, անհայր մնացած ընտանիքի մասին։
«Հոյակապ, հիասքանչ մարդ էր` նվիրված ընտանիքին, եթե հարցնեք շրջապատին, հարևաններին, նրա մասին միայն դրական են խոսում։ Մեծատառով մարդ է եղել։ Անչափահաս երեխաներ ուներ` 14 և 7 տարեկան, կինը 35 տարեկան է։ Արմենը հուլիսին կդառնար 37 տարեկան։ Ընտանիքի միակ աշխատողն էր, ատամնատեխնիկ, աշխատում էր գիշերային հերթափոխով։ Նա այդ ժամին 63 ավտոբուսով աշխատանքի գնալիս է եղել։ Արմենը տեղ հասնելուց հետո միշտ զանգում, տեղեկացնում էր կնոջը, որ արդեն հասել է։ Այդ օրը կինը զանգ չի ստացել, զգացել է, որ ինչ-որ բան է պատահել»,- պատմում է Արմեն Հովհաննիսյանի բարեկամուհին` Աիդա Հովհաննիսյանը։
Նրա խոսքով` Արմենի աղջիկն այդ պահին սոցիալական ցանցից է տեղեկացել, որ Հալաբյան փողոցում ավտոբուս է պայթել։ Կինն անմիջապես զանգահարել է ամուսնու աշխատավայր ու տեղեկացել, որ ամուսինը տեղ չի հասել։ Վազելով հասել է հիվանդանոց ու ամուսնու անունը չի գտել վիրավորների ցուցակում։ Այդ ժամանակ արդեն գիտեին, որ երկու զոհ կա, և գիտեին, որ մեկը նա է եղել։
«Մարդկանց ցավը շատ մեծ է, և շատերն այդ ցավի վրա աղ են լցնում։ Ժողովրդի մեջ լուրեր են պտտվում, թե իբր Արմենն այդ մարդու (պայթյունի ենթադրյալ մեղավորը մյուս զոհն է` Ռուբեն Բալյանը) հետ մասնակից է եղել պայթյունին։ Ինչո՞վ է մեղավոր նրա 14-ամյա աղջիկը, որ փողոցում մոտենան, ասեն` քո հայրը մեղավոր է պայթյունի մեջ։ Չէ՞ որ այդ մարդը զոհ է»,- ասում է բարեկամուհին և պնդում, որ համապատասխան մարմինները պետք է ԶԼՄ-ների միջոցով նորմալ, ճիշտ տեղեկություն տրամադրեն։
Բարեկամուհին պատմում է, որ Արմենի տան խուզարկության ժամանակ ինքն էլ է ներկա եղել և ստորագրել խուզարկությանը վերաբերող թղթերի տակ։
«Ես կարող եմ տրամադրել այդ թղթերը, որ տեսնեն` Արմենի տանից խուզարկության ժամանակ ոչինչ չեն գտել»,- ասում է տիկին Աիդան` նշելով, որ այսօր Արմենի ընտանիքը կարեկցության, ցավակցության կարիք ունի, ու նրանք ցավ են ապրում, երբ իրենց հոր կամ ամուսնու մասին նման խոսակցություններ են լսում։
Կինը կրկնում է` Արմենն ընդամենը զոհ է եղել, նա իր տեղը զիջել է ինչ-որ տղամարդու, որն ավտոբուս է բարձրացել ձեռնափայտով։ Նրա խոսքով` այսօր ավտոբուսի պայթյունի զոհ դարձած երիտասարդ տղամարդու ընտանիքն իր ցավը թողած` մտածում է, թե ում դիմի, որ իր հարցերի պատասխանը ստանա։
«Քաղաքապետարանից, պաշտոնական մարմիններից որևէ մեկը չի եկել ու ցավակցություն չի հայտնել Արմենի ընտանիքին»,- ցավով նշում է բարեկամուհին` ավելացնելով, որ Արմենի կինն աշխատանքային փորձ և մասնագիտություն չունի, ու լավ կլիներ, եթե նրան ինչ-որ աշխատանքով ապահովեին։
Նշենք, որ ՀՀ քննչական կոմիտեի տարածած հայտարարության համաձայն`ավտոբուսի պայթյունի վայրի զննությամբ, ի թիվս քրեական գործով էական նշանակություն ունեցող այլ առարկաների, հայտնաբերվել է բջջային հեռախոսային քարտ։ ԱԱԾ օպերատիվ-հետախուզական մարմինների հետ համագործակցաբար պարզվել է տվյալ քարտի բաժանորդի ինքնությունը, ով ՀՀ քաղաքացի է, նախկինում երկու անգամ դատված։ Նրա բնակության վայրում օրենքով սահմանված կարգով ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) և տարբեր տեսակի էլեկտրասարքավորումներ։
Նախկինում երկու անգամ դատված անձը պայթուցիկն այդ ավտոբուսով տեղափոխելիս է եղել իրենց տուն՝ մորը պայթեցնելու նպատակով:
«Տրոտիլ» տեսակի պայթուցիկ նյութի տարրեր ու հետքեր են հայտնաբերվել նաև ավտոբուսի և դեպքի վայրի զննությամբ առգրավված փորձանմուշների վրա։
