ԵՐԵՎԱՆ, 1 մայիսի — Sputnik. Մարդիկ, ովքեր շատ ընկերներ ունեն, կարողանում են ավելի լավ հաղթահարել ցավը: Նման եզրակացության են եկել Օքսվորդի համալսարանի գիտնականները, հայտնում է ՌԻԱ Նովոստին` ներկայացնելով Scientific Reports ամսագրում հրապարակված ուսումնասիրությունը:
Պատճառն էնդորֆինն է՝ հաճույքի և ուրախության հորմոնը, որը նվազեցնում է ցավի զգացումն ու նպաստում ինքնազգացողության բարձրացմանը:
Էնդորֆինի ակտիվությունը որքան բարձր է, այնքան ավելի բարձր է զգայունության շեմը: Էնդորֆիններն իրենց ցավազրկելու հատկությամբ հավասարազոր են մորֆիին, նշված է հետազոտության մեջ:
Գիտնականներ Կատերինա Ջոնսոնն ու Ռոբին Դանբարը եզրակացրել են, որ էնդորֆիններն օգնում են հաղթահարել ոչ միայն ֆիզիկական անհարմարությունները, այլև ազդում են մարդկային շփումից ստացած հաճույքի վրա:
«Մարդկանց հետ ունեցած կապվածությունը շատ կարևոր է մեր գոյատևման համար, կարևոր չէ՝ խոսքը մեր ծնողների, զավակների, թե ընկերների մասին է», — համոզված է Ջոնսոնը:
Գիտնականներն ուսումնասիրել են 18-ից 34 տարեկան 101 մեծահասակի շփման շրջանակն ու ցավի շեմը: Փորձի մասնակիցները հարցաթերթիկում նշել են իրենց ընկերների հետ ունեցած հանդիպումների ու զրույցների հաճախականությունը, հետո մասնակիցներին խնդրել են նստել անհարմար դիրքով: Փորձը ցույց է տվել, որ այն մարդիկ, ովքեր ավելի հաճախ են շփվում իրենց ընկերների հետ, անհամեմատ ցավադիմացկուն են:
Սակայն գիտնականները դեռ պետք է պարզեն՝ սոցիալական ակտիվությո՞ւնն է խթան հանդիսանում, որ օրգանիզմում էնդորֆինն ավելի մեծ քանակով արտադրվի և բթացնի ցավի զգացողությունը, թե՞ մարդիկ ավելի շատ հաճույք են ստանում ընկերների հետ շփումից:
