ԵՐԵՎԱՆ, 30 ապրիլի- Sputnik, Լաուրա Սարգսյան. Հայաստանը հսկայական ներուժ ունի զբոսաշրջության ոլորտի զարգացման համար, կարծում է «Աստանայի երիտասարդության գործարար խորհուրդ» կազմակերպության նախագահ Սախմետով Կայիրբոլատ Մենբուլատովիչը:
Նա ԵՏՄ երկրների երիտասարդ փորձագետների հետ մասնակցում է Եվրասիական միության միջազգային երիտասարդական համաժողովին:
Չնայած նրան, որ Կայիրբոլատն առաջին անգամ է Հայաստանում, այնուամենայնիվ, նա հասցրել է գնահատել հայկական ոգին և հյուրընկալությունը:
«Հայաստանը հարուստ պատմություն ունի, տարբեր դարաշրջանների հուշարձաններ և հնագույն քաղաքակրթություն: Պետք է բացահայտել երկրի զբոսաշրջային ներուժը տարբեր երկրներում ներկայացնելու, միջազգային ցուցահանդեսներին մասնակցելու միջոցով»,- Sputnik Արմենիայի թղթակցի հետ զրույցում ասաց Ղազախստանի ներկայացուցիչը:
Նա նաև նշեց, որ իրեն դուր են եկել հայկական խոհանոցը, ծառայությունների ոլորտը, մաքուր օդը և ժողովրդի հանդուրժողականությունը: Նա պատվիրակության անդամների հետ եղել է Գառնիում, Գեղարդում և Մայր Աթոռ սուրբ Էջմիածնում:
Կայիրբոլատը նաև նշեց, որ Հայաստանը՝ որպես ԵՏՄ գործընկեր և Ղազախստանի դաշնակից երկիր, բիզնես վարելու հիանալի հնարավորություններ ունի:
«Այս ոլորտում Հայաստանը մրցունակության մակարդակով առաջատար տեղ է զբաղեցնում ԵՏՄ երկրների շարքում: Բացի այդ, Հայաստանը գրավիչ է աշխարհագրական և Իրանի խոշորագույն շուկայի հետ ունեցած հարևանության տեսանկյունից»,- նշեց Կայիրբոլատը:
Համաժողովի ընթացքում ԵՏՄ երկրների երիտասարդ փորձագետները կարծիքներ ու փորձ փոխանակեցին: Մի շարք որոշումներ ընդունեցին այն մասին, թե ինչպես է պետք բարձրացնել ԵՏՄ արդյունավետությունը՝ հաշվի առնելով ժամանակակից իրողությունները:
Մասնակիցներն առաջարկեցին երիտասարդ առաջնորդների փորձագիտական խորհուրդ ստեղծել՝ ԵՏՄ կարևոր հարցերը լուծելու համար, իսկ հնչած առաջարկներն էլ ուղղել ԵՏՄ հանձնաժողով:
«Մենք աջակցելու ենք միմյանց ինչպես տնտեսական, այնպես էլ քաղաքական հարցերում: Մենք մտադիր ենք հնարավորին չափ շատ հարթակներ ստեղծել երիտասարդության շփման համար՝ ԵՏՄ հիմնական արժեքներն առաջ մղելու, ԵՏՄ երկրների ուսումնական հաստատություններում ուսանողների ուսուցմանն աջակցելու նպատակով»,- ասաց Կայիրբոլատը:
Մասնակիցները որոշեցին երկխոսություն հաստատել շահագրգիռ օղակների միջև՝ փորձի փոխանակման և զբոսաշրջության ու բիզնեսի զարգացման նպատակով:
Զբոսաշրջության հայկական ինստիտուտի բազայի վրա անցկացված համաժողովի շրջանակում քննարկվեցին նաև երիտասարդության ինտեգրացիոն ներուժի խնդիրները, ԵՏՄ երկրների պատմության, գիտության, մշակույթի, կրթության և զբոսաշրջության զարգացման միտումները միասնական տնտեսական տարածության շրջանակում:
