ԵՐԵՎԱՆ, 30 ապրիլի — Sputnik. ԱՄՆ Կոռնելի համալսարանի գիտանականները նշել են այն ժամանակահատվածը, որի ընթացքում մարդկությունը կապ կհաստատի այլմոլորակային բանականության հետ:
Նրանք եզրակացրել են, որ զարգացման այսօրվա տեմպերի շնորհիվ մարդկությունը մեկ այլ քաղաքակրթության հետ կապ կհաստատի մոտավորապես 1,5 հազար տարի անց: Թեև այս հարցում մի կարևոր խնդիր կա. աստղագետների ուսումնասիրությունները ցույց են տալիս, որ մոլորակից 40 լուսային տարի շառավղով այլմոլորակային քաղաքակրթություններ չկան:
Աստղագետները ենթադրում են, որ միջաստղային շփման համար բավական հզոր ռադիոազդանշանն առաջին անգամ ուղարկվել է դեռ 1936թ.-ին, Բեռլինի Օլիմպիական խաղերի բացման ընթացքում, երբ ելույթ է ունեցել Հիտլերը: Այդ ընթացքում այլմոլորակային քաղաքակրթությունը կարող էր ընդունել այդ ազանշանը և պատասխանել հետադարձ ազդանշանի միջոցով):
40 լուսային տարի շառավղով տարածքում բանական քաղաքակրթություն լինելու հավանականությունը հավասար է մեկ տասհազարերորդի: Ծիր կաթինում կարող է լինել (անցյալում և ներկայում) շուրջ 78,1 մլն բանականություն ունեցող քաղաքակրթություն:
Գիտնականներն իրենց աշխատանքում օգտագործել են Դրեյքի հավասարումը, որը թույլ է տալիս գնահատել բանական քաղաքակրթությունների քանակը գալակտիկայում կամ տիեզերքում: Գիտնականներն իրենց հետազոտության գլխավոր նպատակը համարել են Էնրիկո Ֆերմիի պարադոքսի հերքումը, որի համաձայն՝ եթե ողջ տիեզերքում կամ գալակտիկայում գոյություն ունենային բազմաթիվ բանական քաղաքակրթություններ, ապա դրանք նկատելի կլինեին: Նոր հետազոտությունը ցույց է տալիս, որ ահռելի տիեզերական տարածությունները և կյանքի գոյության համեմատաբար ոչ մեծ հավանականությունը նույնիսկ երկրի նման մոլորակում, թույլ են տալիս վերանայել պարադոքսը:
Այսօրինակ հետաքրքիր և լրահոսից դուրս մնացած այլ նորություններին հետևեք նաև Sputnik Արմենիա ռադիոկայանի «Ուրիշ նորություններ» հաղորդաշարի շրջանակում։
