ԵՐԵՎԱՆ, 29 ապրիլի — Sputnik. Հայաստանը բանակցությունների սեղանի մոտ կվերադառնա, երբ կիրագործվեն նախկինում ձեռք բերված պայմանավորվածությունները, մասնավորապես` հրադադարի ռեժիմը, ուրբաթ լրագրողներին ասաց ՀՀԿ խմբակցության ղեկավար Վահրամ Բաղդասարյանը։
Հայաստանի նախագահ Սերժ Սարգսյանն ապրիլի 28-ին 3 պայման է ներկայացրել բանակցությունների վերսկսման համար` վստահության հետաքննության մեխանիզմների ներդնում, հասցեական հայտարարություններ և երաշխիքներ, որ Ադրբեջանը ԼՂՀ ժողովրդի նկատմամբ նոր ագրեսիայի և ահաբեկչության չի գնա։
«Մենք խաղաղության կայուն պահպանման կոչ ենք անում։ Մենք դիմել ենք Ադրբեջանին և Մինսկի խմբին, որ նրանք խաղաղության պահպանման երաշխիքներ տան, որպեսզի շփման գծում միջադեպերի հետաքննության մեխանիզմներ ներդրվեն։ Բացի այդ, միջազգային հանրությունը պետք է հասցեական ասի, թե ով է խախտում հրադադարը», — ասել է Բաղդասարյանը։
Նրա խոսքով` սկզբում Ադրբեջանը կտրականապես մերժում էր այս առաջարկները, սակայն վերջին ժամանակաշրջանում սկսել է քննարկել դրանք։
Նա նշել է, որ հայկական կողմի նշված կետերն, ի տարբերություն Ադրբեջանի հայտարարությունների, անիրականանալի չեն։
Մյուս կողմից` հայ դիվանագետները չեն կարող բանակցությունների սեղանի շուրջ նստել առանց երաշխիքների, երբ սահմանին զինվորներ են զոհվում։
«Մենք առաջարկեցինք այն, ինչ առաջարկել էին ԱՄՆ-ն, Ֆրանսիան և Ռուսաստանը` հատուկ սարքեր տեղադրել հրադադարը խախտողին հայտնաբերելու համար։ Թող մեխանիզմներ մշակվեն և կոնկրետ մեղավորներ նշվեն», — ասել է Բաղդասարյանը։
Բաղդասարյանի խոսքով` հայկական կողմը պահանջում է պահպանել այն պայմանավորվածությունը, որը ձեռք էր բերվել 1994-95 թվականներին։
Նա ընդգծել է, որ քառօրյա պատերազմից հետո այլևս չեն հավատում, որ Ադրբեջանը կկատարի պայմանավորվածությունները։ Հենց այդ պատճառով էլ հայկական կողմը երեք պահանջ է ներկայացրել բանակցությունների սեղանի շուրջ վերադառնալու համար։
