ԵՐԵՎԱՆ, 29 ապրիլի — Sputnik. «Ոգու առագաստներ. Ներառական ճամբար Սևանա լճում 2016» միջոցառումը կանցկացվի Հայաստանում ապրիլի 29-ից մայիսի 7-ը, Sputnik Արմենիա միջազգային մամուլի կենտրոնում ասաց ԳՄՌԿ մշակութային և հասարակական ծրագրերի բաժնի ղեկավար Իրինա Կասացկայան։
Այս ծրագիրը «Ոգու առագաստներ» ներառական առագաստային սպորտի համառուսական մրցումներին և ներառական առագաստային շուրջերկրյա արշավի նախապատրաստական փուլերից մեկն է։ «Ոգու առագաստներ» ներառական առագաստային սպորտի համառուսական մրցումներն անցկացվելու են Եկատերինբուրգում 2016 թվականի հունիսի 7-13-ը։ Ծրագրում նախատեսված են առագաստային մարզումներ, կլոր սեղաններ, վարպետության դասեր ու հանդիպումներ տեղի հասարակական կազմակերպությունների և հաշմանդամների տեղի միությունների հետ։
«Առաջին տարին չէ, որ ԳՄՌԿ-ն աջակցում է Ռուսաստան-Հայաստան նախագծերի առաջխաղացմանը։ Երևանում անցած տարի տեղի ունեցավ հաշմանդամություն ունեցող մարդկանց կովկասյան II կոնգրեսը։ Միջոցառումը «Սպիտակ ձեռնափայտ» ռուսական կազմակերպության ներկայացուցիչներին հնարավորություն տվեց ծանոթանալու Ներառական սպորտի ֆեդերացիային, որն իր ճամբարն ունի Սևանի ափին», — նշեց Կասացկայան։
Եկատերինբուրգի «Սպիտակ ձեռնափայտ» կազմակերպության ղեկավար Օլեգ Կոլպաշչիկովը նշեց, որ «Ոգու առագաստներ» նախագիծը զբոսանավով անցկացվող շուրջերկրյա ճանապարհորդություն է` հաշմանդամություն ունեցող մարդկանց մասնակցությամբ։
«Այս նախագիծը հաշմանդամների համար չէ, այլ նախագիծ է, որին մասնակցում են նրանք։ Հաշմանդամություն ունեցող և հաշմանդամություն չունեցող մարդիկ կփորձեն միասին հասնել իրենց առաջ դրված նպատակին` օգտագործելով միմյանց ուժեղ կողմերը։ Այն քաղաքներում, որտեղ մենք անցկացնում ենք մարզումները, անպայման հանդիպում ենք տեղի կազմակերպությունների ներկայացուցիչների, մասնավորապես` հասարակական կազմակերպությունների հետ։ Երբ ծնվեց նախագծի ստեղծման գաղափարը, մեր պատվիրակության կազմում էր AVH կույրերի ֆրանսիական ասոցիացիայի փոխնախագահ Մարկ Օֆրանը», — նշել է Կոլպաշչիկովը։
Նա ավելացրեց, որ Ռուսաստանից ժամանած ամբողջ թիմը պատրաստվում է շրջագայել Հայաստանում։ Թիմը կայցելի Էջմիածնի մշակութային և հոգևոր կենտրոն, արշավներ կկազմակերպվեն, ՀՌՀ-ում (Հայ-ռուսական (Սլավոնական) համալսարան) տեղի կունենան վորքշոփեր, ինչպես նաև` մարզումներ Սևանում։
«Մայիսի 5-ին մենք կրկին Երևանում կլինենք, որտեղ ձեռնափայտերով, անվասայլակներով ֆլեշմոբ կանցկացվի։ Հրավիրում ենք բոլորին», — ասաց Կոլպաշիկովը։
Բացի առագաստային արշավին նախապատրաստվելուց, հումանիստական առաքելության նպատակը նաև այն է, որ հասարակությունը կարևորի ու գնահատի հաշմանդամություն ունեցող մարդկանց դերը։
Նախագծի գործընկերներն են հաշմանդամային սպորտի հայկական ազգային ֆեդերացիան, Հայաստանում ՌԴ դեսպանատունը, ԳՄՌԿ-ն, Association Valentin Haüy (Ֆրանսիա):
«Ոգու առագաստներ» զբոսանավով շուրջերկրյա ճանապարհորդությունը սոցիալական նախագիծ է, որն իրականացվում է 2011 թվականից։ Այն իր մեջ ներառում է առագաստային սպորտի և լողի ներառական խմբակներ և առագաստային սպորտի ներառական մրցումներ։
Շուրջերկրյա ճանապարհորդությանը նախապատրաստության ընթացքում 11 մարզական փուլերն անցկացվել են Բալթիկ, Հյուսիսային, Անդամանյան, Կարիբյան, Միջերկրական, Սև, Ազովի ծովերում և Բայկալ լճում։
Մարզական փուլին մասնակցել է 122 հոգի, որոնցից 61-ը` տարբեր կարգի հաշմանդամությամբ։ «Ոգու առագաստներ» ներառական թիմը 2014 թվականին երկրորդ տեղն է զբաղեցրել «Բանզայը նվաճում է աշխարհը» միջազգային մրցույթում, իսկ 2015 թվականին` երրորդ տեղը «Կոմատեկի զբոսանավային ակումբի գավաթ» առագաստային մրցումներում։ Նույն տարվա սեպտեմբերին Եկատերինբուրգում առաջին անգամ անցկացվել է ներառական առագաստային սպորտի առաջնությունը։
