ԵՐԵՎԱՆ, 29 ապրիլի- Sputnik. Նոր Ընտրական օրենսգրքի քվեարկությունը խորհրդարանում թեժ կրքեր բորբոքեց, ճեպազրույցների ժամանակ կուսակցությունները ներկայացրին իրենց տեսանկյունները։
«Քանի՞ ձայն էր, 98 ձայն էր, ինքնըստինքյան նշանակում է կոնսենսուս: Առանձին քաղաքական գործիչների մասին չեմ ուզում խոսել: Կարո՞ղ եք նշել մի ֆրակցիա, որի անդամներից մեկը կողմ չի քվեարկել»,- ԱԺ ճեպազրույցների ժամանակ հայտարարեց ՀՀԿ խմբակցության ղեկավար Վահրամ Բաղդասարյանը։
Քվեարկության արդյունքներին բոլորովին այլ կերպ է վերաբերվում «Ժառանգություն» խմբակցության ղեկավար Զարուհի Փոստանջյանը։ Նրա խոսքով` ԸՕ քվեարկությունն անօրինական է եղել, քանի որ լուրջ սխալներ են թույլ տրվել, պատգամավորները չեն կարողացել իրենց կարծիքը հայտնել քվեարկությունից առաջ։
«Փաստորեն Գալուստ Սահակյանը խախտեց ԱԺ կանոնակարգ օրենքը: Ես ուզում էի «Ժառանգություն» կուսակցության կարծիքը հայտնել, որ մենք դեմ ենք քվեարկում»,-ասաց Փոստանջյանը։
Նրա դիրքորոշմանն աջակցեց նաև «Օրինաց երկիր» խմբակցության («Ազգային վերածնունդ» կուսակցություն) պատգամավոր Հովհաննես Մարգարյանը։
«Գոյություն ունի ԱԺ կանոնակարգ օրենք, որը երեկ կյանքի չկոչվեց: Մենք ուզում էինք ասել, որ այդ նախագծին դեմ ենք արտահայտվելու»,- նշեց նա՝ հավելելով, որ ընտրական օրենսգրքի նման քվեարկությունն ու քննարկումը անընդունելի են խմբակցության համար:
«Մենք մեր պայքարը շարունակելու ենք ընդդեմ ապօրինությունների և ընտրակեղծիքների: Մենք պայքարելու ենք, որ մեր առաջարկներն ընդունվեն»,- ասաց նա:
Մարգարյանի կարծիքով` ընտրական օրենսգիրքն ուսումնասիրողները խորը հիասթափություն կապրեն: Նա նշեց, որ կեղծարարները պետք է քրեական պատասխանատվության ենթարկվեն. «Ի՞նչ է, քվեատուփը գողանում ես, որ տանես հետը նկարվե՞ս։ Գրանցամատյանները կարևորագույն փաստաթղթերից մեկն են, դրանում արձանագրվում են բոլոր բողոքները և այլն, բայց եթե չեն լրացնում գրանցամատյանները, 200 հազար դրամ տուգանք է, եթե պարկը չկնքեն, միայն 300 հազար կտուգանվեն»,- ասաց նա:
ՀԱԿ խմբակցության ղեկավար Լևոն Զուրաբյանի կարծիքով էլ` այն, ինչ կատարվեց երեկ ԱԺ-ում, խայտառակություն էր։
Նա նշեց, որ բոլոր կեղծիքները սկսվում են ժողովրդավարական մեխանիզմների խախտումով։
«Բարգավաճ Հայաստան» կուսակցությունն էլ իր դիրքորոշում ունի։ Խմբակցության պատգամավոր Միքայել Մելքումյանի խոսքով` նոր օրենսգիրքը մոտ է միջազգային չափանիշներին, սակայն Հայաստանում շատ բան որոշում է ոչ թե փաստաթուղթը, այլ` դրա կատարումը։
«Խմբակցությունը որոշել էր ազատ քվեարկության ձևաչափով մասնակցել: Մենք մասնակցել ենք 4+4+4 ձևաչափով քննարկումներին և պիտի ասեմ, որ բավականին առաջարկություններ ընդունվել են»,- ասաց նա:
Ընտրական օրենսգիրքն Ազգային ժողովում առաջին ընթերցմամբ ընդունվեց ապրիլի 28-ին։
