ԵՐԵՎԱՆ, 29 ապրիլի — Sputnik. Երևանում բացվեց առաջին ներառական մանկապարտեզը, որտեղ հաշմանդամություն ունեցող երեխաները հնարավորություն ունեն ոչ միայն մասնագիտական աջակցություն ստանալ, այլև շփվել իրենց հասակակիցների հետ ու դառնալ հասարակության լիիրավ անդամ:
Գլոբալ զարգացման խնդիրներ ունեցող փոքրիկ Գոռն առաջին անգամ է մանկապարտեզ գնում։ Առողջական խնդիրների պատճառով նա զրկված է եղել հասակակիցների հետ խաղալու, շփվելու հնարավորությունից։ Բացը լրացնելու համար մայրը` Լուսինե Պողոսյանը, երեխայի հետ տարբեր կենտրոններ է հաճախել, որտեղ նրա հետ զբաղվել են մասնագետներն ու հոգեբանները։ Բայց մանկապարտեզի ու նման կենտրոնների տարբերությունն, ըստ Գոռի մայրիկի, ակնհայտ է։
«Ե´վ ծնողն է թեթևանում իր հոգսերից, և´ երեխան։ Ոչ թե երեխային ծնողը պետք է վերցնի և տարբեր կենտրոններ տանի 1 ժամ պարապելու համար, այլ երեխան հաճախի մանկապարտեզ, որտեղ թե´ մասնագետներն են նրա հետ զբաղվում ամբողջ օրվա ընթացքում, թե´ երեխան է շփվում իր հասակակից երեխաների հետ»,- ասաց Լուսինե Պողոսյանը։
Հայաստանում առաջին ներառական մանկապարտեզն ուրբաթ բացվեց Երևանի Մալաթիա-Սեբաստիա վարչական շրջանի թիվ 92 մանկապարտեզում։ Բացման պաշտոնական արարողությանը ներկա էին ՀՀ առաջին տիկին Ռիտա Սարգսյանը, աշխատանքի և սոցիալական հարցերի ու առողջապահության նախարարները, Երևանի քաղաքապետը։
Ինչպես նշեց աշխատանքի և սոցիալական հարցերի նախարար Արտեմ Ասատրյանը, Հայաստանում կա հաշմանդամություն ունեցող շուրջ 8 հազար երեխա, որոնց հիմնական մասը զրկված է հասարակության լիիրավ անդամ դառնալու հնարավորությունից։
Երեխայի կրթության, ժամանցի կազմակերպման անհնարինությունը շատ ծնողների ստիպում է երեխային տանել հատուկ հաստատություն, որտեղ երեխան էլ ավելի է մեկուսանում հասարակությունից ու մնում միայնակ իր խնդիրների հետ։ Ուստի նախարարն առաջին հերթին կարևորում է հաշմանդամ երեխաների մեկուսացումը կանխելը։
«Շատ ավելի դժվար է արդեն հատուկ հաստատություններում գտնվող երեխաների ընտանիքների կարիքների գնահատում և վերադարձ իրականացնել, և շատ ավելի հեշտ է ունենալ այսպիսի բազմաթիվ կենտրոններ, որպեսզի կարողանանք իրականացնել կանխարգելիչ միջոցառումների համալիր, որը թույլ կտա իրականացնել այդ քաղաքականությունը»,-ասաց Արտեմ Ասատրյանը։
Մանկապարտեզի տնօրեն Կարինե Հարությունյանը տեղեկացրեց, որ նորաբաց մանկապարտեզն արդեն 33 սան ունի` 9-ը ներառական, 24-ը` նախաներառական խմբերում, ևս 9 տեղ դեռ թափուր է, բայց ցանկացողները շատ ավելի շատ են։
«Ես կուզեի, որ ո՛չ հերթագրվածներ լինեն, ո՛չ ընդհանրապես խնդիր ունեցող երեխաներ, բայց եթե ունենք այն, ինչ ունենք, ապա պետք է առավելագույնն անենք այս երեխաներին անսահման սեր և գործնական աջակցություն տալու համար»,- ասաց Կարինե Հարությունյանը։
Արաբկիր բժշկական համալիրի տնօրեն Արա Բաբլոյանը կարևորեց, որ այստեղ հաճախող երեխաների օրը «սկսվում է այնպես, ինչպես բոլոր երեխաներինը»։
Հայաստանում առաջին ներառական մանկապարտեզի հաջողված փորձից հետո ծրագիրը շարունակական է լինելու, և Արա Բաբլոյանի բնորոշմամբ` ծրագրի վերջնական նպատակն է, որ ներառական կրթություն ունենան Հայաստանի բոլոր մանկապարտեզներն ու դպրոցները։
