ԵՐԵՎԱՆ, 29 ապրիլի Sputnik. Լեռնային Ղարաբաղում հողերի հանձնում չի լինելու, այս մասին Արցախի Հանրային Հեռուստատեսությանը և «Մեդիատոն» ընկերությանը տված հարցազրույցում ասել է Արցախի Հանրապետության նախագահ Բակո Սահակյանը:
«Ես տեղյակ եմ հողերի վերադարձի հետ կապված քննարկումների, մեկնաբանությունների մասին, կցանկանայի, որ դադարեցնենք անհիմն քննարկումները»,- ասել է նա:
Նա հորդորել է հակասություններ չփնտրել Հայաստանի և Արցախի տեսակետների միջև:
«Անհրաժեշտ է դադարել հակասություններ փնտրել Հայաստանի և Արցախի տեսակետների միջև: Այդպիսի բան չի կարող լինել: Մենք գործ ունենք համազգային նշանակության խնդրի հետ, չենք կարող ունենալ հակասություններ: Մենք իրականացնում ենք հետևողական աշխատանքներ և դեռ այս պահի դրությամբ չենք ստացել Ադրբեջանի կողմից առաջին և հիմնական պատասխանը՝ ընդունում են նրանք մեր անկախությունը, թե չէ: Եթե չէ, ապա այն, ինչ քննարկվում է, այն, ինչ խոսվում է, առ ոչինչ են»,- ասել է նա:
