ԵՐԵՎԱՆ, 28 ապրիլի — Sputnik. Համաշխարհային բանկի կանխատեսմամբ` 2016թ-ի ընթացքում նավթի գինը համաշխարհային շուկայում կհասնի մեկ բարելի դիմաց 41 դոլարի` վերջին կանխատեսման 1 բարելի դիմաց 37 դոլարի փոխարեն։
Նախկին կանխատեսումը 4 դոլարով բարձրացնելու համար ՀԲ-ի մասնագետները հիմք են ընդունել համաշխարհային շուկայում նավթի ավելցուկային առաջարկի նվազման միտումը։
Սակայն այս փոքրիկ բարելավումը էներգակիրների միջազգային գների վրա էապես չի ազդի։ Դրանք այս տարի ևս, ՀԲ մասնագետների կանխատեսմամբ, կշարունակեն նվազել, բայց ոչ այնքան կտրուկ, որքան անցյալ տարի։
ՀԲ-ի կանխատեսումներով` 2016թ.-ին նավթի, գազի և ածուխի գները միջազգային շուկայում անցյալ տարվա համեմատ կնվազեն 19.3%-ով։ Համեմատության համար նշենք, որ 2015-ին 2014-ի համեմատ նվազումը 24.7 % էր կազմել։
ՀԲ-ն վերանայել է նաև մետաղների գների այս տարվա կանխատեսումները։ Եթե տարեսկզբին 10,2% անկում էր կանխատեսվել, ապա այժմ այն 8,2% է գնահատվում։
ՀԲ-ում նաև գյուղատնտեսական ապրանքների գնանկում են կանխատեսում` պայմանավորված ոչ միայն էներգակիրների գների նվազման, այլև սպասվող առատ բերքի կանխատեսմամբ։
