ԵՐԵՎԱՆ, 27 ապրիլի — Sputnik. ՌԴ արտաքին գործերի նախարարության պաշտոնական ներկայացուցիչ Մարիա Զախարովան ապրիլի 27-ին հայտարարել Է, որ Լեռնային Ղարաբաղի հակամարտության գոտում տիրող իրավիճակում պահանջվում է ցուցաբերել զսպվածություն, առաջնահերթ խնդիրն ագրեսիայի նոր բռնկում թույլ չտալն է:
«Այն, ինչ այժմ տեղի Է ունենում Լեռնային Ղարաբաղում, մեր այն թեզիսի հաստատումն է, որ այժմ, ինչպես երբեք, պահանջվում Է ցուցաբերել զսպվածություն և հասնել կայունության վերականգնման»,-ասել է Զախարովան ճեպազրույցի ընթացքում:
Նրա խոսքով՝ ՌԴ ԱԳՆ-ում համոզված են, որ կողմերը պետք է վերսկսեն բանակցային գործընթացը, որը նպատակաուղղված լինի կայուն խաղաղ կարգավորման հասնելուն:
«Սկզբունքորեն կարևոր ենք համարում առկա պայմանավորվածությունների հիման վրա ռազմական ռիսկերի նվազեցմանն ուղղված աշխատանքի ակտիվացումը»,-ասել է նա:
«Այժմ առաջնահերթ խնդիրը, անտարակույս, իրադրության հանդարտեցումն է, նոր ագրեսիա, նոր արյունահեղություն թույլ չտալը և, անշուշտ, այնպիսի մթնոլորտի վերականգնումը, որը կնպաստեր թե՛ իրադրության հանդարտեցմանը, թե՛, իհարկե, բանակցային գործընթացի գործարկմանը: Սրանք սկզբունքորեն կարևոր հարցեր են»,-ընդգծել է Զախարովան:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
