ԵՐԵՎԱՆ, 27 ապրիլի — Sputnik. ՀՀ կառավարությունը հայկական շուկան թուրքական ապրանքներից պաշտպանելու ծրագիր է նախապատրաստում, ԱԺ-ում հարցուպատասխանի ժամանակ ասաց էկոնոմիկայի նախարար Արծվիկ Մինասյանը։
Նրա խոսքով` Հայաստանը ԱՀԿ անդամ է և չի կարող կազմակերպության կանոնակարգին հակասող քայլեր ձեռնարկել։ Սակայն մի կարևւոր փաստ էլ կա։ ԱՀԿ-ին անդամակցելիս Թուրքիան հայտարարել էր, թե չի ճանաչում Հայաստանին՝ որպես ԱՀԿ անդամ և նրա վրա չի տարածելու այդ կանոնները։
«ԵՏՄ անդամակցության շրջանակում Հայաստանը գործիքներ ունի, որոնք թույլ են տալիս առանձին դեպքերում կոնկրետ քայլեր ձեռնարկել։ Դրանք պետք է հստակ հաշվարկել, որպեսզի սոցիալապես պայթյունավտանգ իրադրություն չստեղծվի»,- ասաց նախարարը։
Նրա խոսքով` ոչ հեռու ապագայում ՀՀ կառավարությունը կներկայացնի թուրքական ծագումով ապրանքների նկատմամբ միջոցների մասին իր առաջարկները։
Կառավարության ծրագրերի մասին Մինասյանին հարց էր ուղղել «Օրինաց երկիր» խմբակցության պատգամավոր Լևոն Դոխոլյանը, որն ավելի վաղ առաջարկել էր հրաժարվել թուրքական ապրանքներ գնելուց։
