ԵՐԵՎԱՆ, 27 ապրիլի — Sputnik. ԱԺ փոխնախագահ Էդուարդ Շարմազանովը Հայաստանի նախկին արտգործնախարար Վարդան Օսկանյանի հայտարարությանն ի պատասխան Օսկանյանին հիշեցրեց, որ նա երկու անգամ Հայաստանի արտգործնախարար է նշանակվել։
Օսկանյանը չորեքշաբթի ԱԺ ամբիոնից ելույթ ունենալիս ասաց. «Երկու տասնամյակ Հայաստանում ընտրությունները կեղծվել են, իսկ մենք դա արձանագրում ենք։ Կեղծվել են ընտրակաշառք բաժանելով, կարուսելներ կազմակերպելով, կրկնակի քվեարկություններով, այլ բացակա անձանց կողմից քվեարկելով, լցոնումներով, կեղծվել են բոլոր տեսակի հաշվառման ժամանակ խարդախություններով»։
Օսկանյանից հետո ելույթ ունեցավ Էդուարդ Շարմազանովը` հիշեցնելով, որ Օսկանյանը նշանակվել է հենց այդ նույն ընտրություններից հետո։
«Հայտարարվեց, որ 20 տարի շարունակ կեղծվել են ընտրությունները: Ես չեմ հիշում, որ իմ հարգարժան ավագ գործընկերը, երբ բարձր պաշտոն էր զբաղեցնում, նման հայտարարություն արած լիներ: Գուցե թաքուն ղեկավարության ականջին ասել է՝ չգիտեմ, բայց հրապարակային չեմ հիշում, պարոն Օսկանյան: Եթե 20 տարի կեղծվել են ընտրությունները, ապա գոնե 1998-ին եւ 2003-ին նախագահական ընտրություններից հետո դուք ՀՀ նախագահի կողմից նշանակվել եք որպես արտգործնախարար այդ կեղծված ընտրություններից հետո, դա դուք եք ասում, ես չեմ ասում, կարելի՞ է ենթադրել, որ դուք, որպես արտգործնախարար եւ ձեր նշանակումը չի եղել ոչ լեգալ, ոչ լեգիտիմ», — հարցրեց Շարմազանովը։
Խոսելով Օսկանյանի կողմից նոր կուսակցություն ստեղծելու մասին` փոխխոսնակը նշեց, որ յուրաքանչյուր քաղաքական գործիչ ինքն է որոշում`ստեղծել կուսակցություն, թե ոչ, առաջ շարժվել, թե ոչ։
Նրա խոսքով` վերջին ժամանակաշրջանում բոլոր նոր կուսակցությունները հայտարարեցին, որ ծայրահեղական են, ձգտելու են իշխանության, որ նրանք իշխող ուժերի այլընտրանք են։
