ԵՐԵՎԱՆ, 27 ապրիլի — Sputnik. Լեռնային Ղարաբաղի ԼՂՀ Պաշտպանության բանակի լրատվական ծառայության ղեկավարը հերքել է Բաքվի այն հայտարարությունները, թե ղարաբաղյան կողմն արգելված զինամթերք է կիրառում։
«Լուրը, թե արգելված ռազմամթերք ենք կիրառում, Բաքվի հերթական զառանցանքն է», — հայտարարել է Սենոր Հասրաթյանը։
Նա նշել է, որ հիմնականում ադրբեջանական կողմն է օգտագործում միջազգային կոնվենցիաներով արգելվող սպառազինություն ու զինամթերք, և, իր սովորության համաձայն, փորձում է ամեն ինչ գլխիվայր ներկայացնել:
«Ադրբեջանական կողմն իր այդ հայտարարությունների համար դեռ շատ է զղջալու»,- ասել է Հասրաթյանը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
