ԵՐԵՎԱՆ, 27 ապրիլի — Sputnik. Ապրիլի 25-ի երեկոյան Երևանի Հալաբյան փողոցում թիվ 63 երթուղու ավտոբուսում տեղի ունեցած պայթյունի պատճառը հայ հանրությունն անմիջապես վերագրեց ավտոբուսի տեխնիկական վիճակին։ Այսօր լրագրողների հետ հանդիպմանն ասաց «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը`փաստելով, որ հանրության մտահոգությունն անհիմն չէ։
«Սպասում ենք, որովհետև բոլոր օբյեկտիվ հիմքերն ունենք»,- ասաց բանախոսը` հիշեցնելով նախկինում տեղի ունեցած տրանսպորտային վթարներն ու ավելացրեց. «Պատկան կառույցները, սակայն, բարեփոխումների մասին հայտարարություններից այն կողմ չեն անցնում»։
Իսկ բարեփոխումների համար, ըստ Պիպոյանի, անհրաժեշտ է վերանայել մայրաքաղաքի տրանսպորտային համակարգը և վեր կանգնել անձնական շահերից։
«Ես իմ պահանջն ունեմ Երևանի քաղաքապետարանից։ Երևանի քաղաքապետը գիծ ունի, քաղաքապետարանի ինչ-որ աշխատող գիծ ունի, թե չունի, կամ քանի պատգամավորի գիծ ունի, ինձ չի հետաքրքրում։ Ես ասում եմ` ամոթ է, մենք պետք է հասկանանք, որ իրավունք չունենք մեր երկրում, խաղաղ ժամանակ, միայն մեր անփութության պատճառով զոհ տալ»,- ասաց Բաբկեն Պիպոյանը։
«Սպառողների միություն» ՀԿ նախագահ Արմեն Պողոսյանը, թեև կիսում է իր գործընկերոջ կարծիքը, բայց և հիշեցնում, որ քաղաքային տրանսպորտի կարգավորման համար տարիներ շարունակ վարվող պայքարը որևէ արդյունք չի տվել` նույն այդ անձնական ու բիզնես շահերի պատճառով։
«Մենք գիտենք, որ ավտոմեքենաների մեծ մասը տեխզննում չի անցել, գիտենք, որ մեծ մասն անցել է իր աշխատանքի ժամկետը և բուժման ձևն էլ գիտենք, բայց կան շահեր»,- ասում է սպառողների շահերի պաշտպանը։
Իսկ սոցիոլոգ Ահարոն Ադիբեկյանին Հալաբյան փողոցում տեղի ունեցած պայթյունը ստիպել է վերհիշել պաշտոնական մի վիճակագրություն, որի համաձայն` յուրաքանչյուր 1000 մարդուց 100-ն ունի հոգեկան խանգարումներ, 100-ից 10-ն ունի բուժման կարիք, բայց իրականում բուժվում է 10-ից միայն 1-ը։ Մնացած 9-ն ապրում են հասարակության մեջ`պոտենցիալ վտանգ ներկայացնելով հանրության համար։ Հայ հասարակությունը, սակայն, Ահարոն Ադիբեկյանի համոզմամբ, անտարբեր է իր կողքին ապրող ու պոտենցիալ վտանգավոր այդ անձանց նկատմամբ։
«Եթե մեկը մի բան է անում, շրջվում ենք, աշխատում ենք չնայել, չտեսնել, մինչդեռ հակառակը`պետք է նայենք, հետևենք և եթե տագնապի պահ կա, դիմենք վարորդին, որ ավտոմեքենան արգելակի, այդ մարդուն դուրս տանենք, տեսնենք ով է և ինչ է անում»,- ասաց Ահարոն Ադիբեկյանը` նշելով, որ եթե ապրիլի 25-ի երեկոյան 63 համարի ավտոբուսի ուղևորներն ուշադիր լինեին իրենց կողքին նստած կասկածելի անձնավորության նկատմամբ, հնարավոր կլիներ խուսափել դժբախտ պատահարից ։
Նախկինում ավտոբուսի վարորդը պարտավոր էր նաև վերահսկել ուղևորների վարքն ու հետևել ավտոմեքենայում տեղի ունեցող անցուդարձին, հիշում է սոցիոլոգն ու հավելում` այսօր վարորդին հետաքրքրում է միայն ուղեվարձը։
Ի դեպ, Ահարոն Ադիբեկյանը պատահարից հետո հատուկ հետևել է նաև պաշտոնական լրահոսին ու փաստում է` անգամ պատահարին հետևած օրերին պատկան կառույցները հանրությանը չեն նախապատրաստում հաջորդ անգամ հնարավոր դեպքերից խուսափելու և ամբողջ աշխարհում վաղուց արդեն տարածում գտած ահաբեկչությունից պաշտպանվելու մեթոդներին։
