«Արմենիա» բժշկական կենտրոնում հերթապահում են նախօրեին ավտոբուսի պայթյունից տուժած մարդիկ։
Գիշերը վիրավորված անձանց վիճակի մասին անհանգստանում են նաև հիվանդանոցում բուժում ստացողները։ Նրանցից մեկը մեզ շփոթեց վիրավորների հարազատների հետ ու սկսեց հարցեր տալ նրանց վիճակի մասին։
Երևանում ավտոբուսի պայթյունից տուժած 2 դեռահասներին տեղափոխել են «Սուրբ Աստվածամայր» մանկական հիվանդանոց, նրանց վիճակը գնահատվում է կայուն: Մեկ մարդու տեղափոխել են ԼՕՌ բաժանմունք, նա կոնտուզիա ուներ։ Հղի կնոջ ու նրա պտղի վիճակը գնահատվում է կայուն։
«Նա 20 շաբաթական հղիություն ունի, տվյալ պահին նրան և պտղին ոչինչ չի սպառնում։ Սակայն վիժումից խուսափելու համար նա պետք է որոշ բուժում ստանա»,- Sputnik Արմենիայի հետ զրույցում ասաց ՀՀ ԱՆ գլխավոր մանկաբարձ-գինեկոլոգ Ռազմիկ Աբրահամյանը։
14 տարեկան Անահիտին պալատ են տեղափոխել։ Նա դեռ շոկի մեջ է տեսածից։
Բժիշկները հրաշք են համարում, որ նման պայմաններում վիրավորվածների ներքին օրգանները չեն տուժել։
Գրեթե բոլոր վիրավորները միանման վիրավորում են ստացել` կրծքավանդակի սալջարդ, վերջույթների վնասվածք, լսողության խանգարում։
