ԵՐԵՎԱՆ, 26 ապրիլի — Sputnik. Թերությունները, որոնք բացահայտվել են ապրիլյան պատերազմի ժամանակ, պետք է վերացնել, ասել է Հայաստանի հանրապետական կուսակցության խմբակցության ղեկավար Վահրամ Բաղդասարյանը` մեկնաբանելով մի շարք բարձրաստիճան պաշտոնյաների ազատումները։
ՀՀ նախագահ Սերժ Սարգսյանը պաշտոնյաներին աշխատանքից ազատելու հրամանագրերը ստորագրել է ապրիլի 26-ին։
«Քառօրյա պատերազմը ճիշտ մարտավարության, ռազմական արվեստի, հրամանատարական կազմի պրոֆեսիոնալիզմի, մեր զինվորների ոգու հաղթանակն էր։ Սակայն ներքին օղակներում կան թերություններ, որոնց համար պետք է իրենց պատիժը կրեն` կապված զբաղեցրած պաշտոնից ազատվելու հետ»,- ասաց Բաղդասարյանը։
Նրա խոսքով` պետք էր ավելի ուշադիր լինել։ Եղել է քառօրյա պատերազմ, և հայկական կողմը չի խոսում պարգևների մասին։
«Մենք տեսնում ենք այն թերացումները, որոնք պետք է հաղթահարել»,- ասաց Բաղդասարյանը։
Նա նշեց, որ եթե քրեական պատասխանատվության անհրաժեշտություն լինի, ապա դա էլ կլինի։
Հայաստանի ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանն էլ նշեց, որ պետք չէ պաշտոնանկ արված մարդկանց շարքում «քավության նոխազներ» փնտրել։
«Ես կարծում եմ, որ պետք է հետևություններ անել բոլոր ուղղություններով, ոչ միայն ռազմական, այլև խորհրդարանական, դիվանագիտական, քաղաքական, այդ բոլոր ոլորտներում մենք անելիք ունենք»,- ասաց Նահապետյանը։ Նրա խոսքով` արդեն ձեռնարկվել են որոշակի քայլեր, գործընկերների հետ հաջողություններ կան ոչ միայն հայկական դիրքորոշումը ներկայացնելու հարցում։
Ինչպես նշեց Նահապետյանը, ռազմական ոլորտում նույնպես բացահայտվել են խնդիրներ, որոնք անհապաղ լուծում են պահանջում։
Նրա խոսքով` եթե աշխատանքից հեռացված մարդիկ ինչ-որ հանցագործություններ են կատարել, նրանք համապատասխան պատիժ կկրեն։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում է ձեռք բերվել պայմանավորվածություն ռազմական գործողությունները դադարեցնելու մասին, սակայն երկու կողմերն էլ հայտարարում են, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
