ԵՐԵՎԱՆ, 26 ապրիլի-Sputnik. Ժուժաննա Յակաբը մեծ ուրախությամբ նշեց, որ Հայաստանը շատ տպավորիչ հաջողություններ է արձանագրել վարակիչ հիվանդությունների կանխարգելման ու դրանց հանդեպ հսկողության ուղղությամբ։
«Հայաստանն արդեն մի քանի տարի ճանաչվել է մալարիայից ու պոլիոմելիտից ազատ երկիր։ Գերազանց կերպով իրականացվում է Հայաստանում պատվաստումների ծրագիրը, և Հայաստանը մեզ համար տարածաշրջանում դիտվում է պատվաստումների հետ կապված օրինակելի երկիր»,-ասաց նա։
Ի պատասխան` առողջապահության նախարար Արմեն Մուրադյանն ասաց, որ այսօր խիստ արդիական են մնում ոչ ինֆեկցիոն հիվանդությունները, որոնք Հայաստանում 80 տոկոսից ավելի մահացության պատճառ են հանդիսանում:
Նախարարի խոսքով` խիստ կարևոր են դեղորայքի օպտիմալ օգտագործման գործընթացները, մասնավորապես՝ հակաբիոտիկների հետ կապված, մոր և մանկան առողջությունը և մի շարք այլ հարցեր, որոնք բանակցությունների օրակարգում են։
Քննարկումներն ու ոլորտի առաջնահերթություններն ուղենշելը հիմք կդառնան, որ խնդիրների լուծումը դառնա ուղղորդված ու նպատակային։
