ԵՐԵՎԱՆ, 26 ապրիլի – Sputnik. Լեռնային Ղարաբաղի հակամարտության սրման ժամանակ Հայաստանն օգնության խնդրանքով չի դիմել Հավաքական անվտանգության պայմանագրի կազմակերպությանը։ Այդ մասին լրագրողներին է ասել ՀԱՊԿ գլխավոր քարտուղար Նիկոլայ Բորդյուժան:
«Ոչ մի խնդրանք չի եղել»,- հայտարարել է Բորդյուժան՝ պատասխանելով համապատասխան հարցին։
Նա նշել է, որ պետության բարձրագույն ղեկավարության հետ շփումների ժամանակ իրեն հասկացրել են, որ «Հայաստանը մեծ հաշվով գործի չի դրել իր ներուժի մեծ մասը», այդ պատճառով ոչ մի խնդրանք չի եղել:
Բորդյուժան նաև դրական պատասխան է տվել լրագրողի հարցին, թե արդյոք այն փաստը, որ Լեռնային Ղարաբաղը միջազգային իրավունքի համապատասխան Հայաստանի մաս չի կազմում, ՀԱՊԿ ուժերը կարող են Հայաստանին պաշտպանության գալ միայն միջազգայնորեն ճանաչված սահմանների վրա հարձակվելու ժամանակ։
«Այո՛, դուք ճիշտ եք հասկանում»,- հայտարարել է նա:
Պաշտոնյան նաև նշել է, որ Լեռնային Ղարաբաղի շրջանում իրավիճակը մեծ նշանակություն ունի ՀԱՊԿ-ի պատասխանատվության գոտու անվտանգության ապահովման առումով։
«Եթե կրկնություն լինի (զինված գործողությունների), կգա մի շրջան, երբ մենք կհետևենք ակտիվ և անմիջական զինված հակամարտության, դա «կպայթեցնի» ողջ Կովկասը: Այդ ժամանակ այդ հակամարտության մեջ կներգրավվեն շատ այլ պետություններ, և դա կանդրադառնա Կովկասի շատ ժողովուրդների վրա։ Դա շատ լուրջ է, ես կարծում եմ՝ այսօր որոշիչ է այնտեղ խաղաղություն ապահովելը, որովհետև հակառակ դեպքում Կովկասում շատ մեծ պատերազմ կլինի: Ես դա չէի ցանկանա»,- ասել է Բորդյուժան։
