ԵՐԵՎԱՆ, 26 ապրիլի — Sputnik. Այս շաբաթ Հայաստանի մայրաքաղաք Երևան էր ժամանել ավելի քան 400 մարդ՝ «Ավրորա» անդրանիկ մրցանակաբաշխությանը եւ դրա հետ կապված միջոցառումների շարքին մասնակցելու համար։ «Ավրորա» մրցանակի դափնեկիր ճանաչվեց Մարգարիտ Բարանկիցեն (Բուրունդիի «Խաղաղության տուն» վերականգնողական կենտրոն եւ REMA հիվանդանոց), որն իր հերթին մեկ միլիոն դոլարի գլխավոր մրցանակն ուղղորդեց Լյուքսեմբուրգի Մեծ Դքսի եւ Մեծ Դքսուհու հիմնադրամին, «Ժան-Ֆրանսուա Պետերբրոկ» հիմնադրամին և «Բրիդերլեխ Դելեն» հիմնադրամին (Լյուքսեմբուրգ)։
Սերժ Թանկյանի և Շառլ Ազնավուրի ստեղծագործությունների ուղեկցությամբ տեղի ունեցած հանդիսավոր արարողությանը մեծարման արժանացավ այն անձնվեր գործը, որը կատարել են մրցանակի չորս հավակնորդները՝ Մարգարիտ Բարանկիցեն (Բուրունդիի «Խաղաղության տուն» վերականգնողական կենտրոն եւ REMA հիվանդանոց), Դոկտոր Թոմ Քաթինան (Սուդանի Նուբա լեռների «Գթության Մայր» հիվանդանոց), Սայիդա Ղուլամ Ֆաթիման (Պակիստանի «Կախյալ շահագործվողների ազատագրության ճակատի» գլխավոր քարտուղար) եւ Հայր Բեռնար Կինվին (Կենտրոնաաֆրիկյան Հանրապետության Բոսեմտելե քաղաքի կաթոլիկ միսիայի վանահայր)։
«Ավրորա» անդրանիկ մրցանակաբաշխության հատուկ առիթով երեք մյուս հավակնորդները՝ Դոկտոր Թոմ Քաթինան (Սուդանի Նուբա լեռների «Գթության Մայր» հիվանդանոց), Սայիդա Ղուլամ Ֆաթիման (Պակիստանի «Կախյալ շահագործվողների ազատագրության ճակատի» գլխավոր քարտուղար) եւ Հայր Բեռնար Կինվին (Կենտրոնաաֆրիկյան Հանրապետության Բոսեմտելե քաղաքի կաթոլիկ միսիայի վանահայր) յուրաքանչյուրը պարգեւատրվեցին 25,000 ԱՄՆ դոլարի դրամաշնորհով՝ իբրև օժանդակություն այն կազմակերպություններին, որոնք նրանց ոգեշնչել են գործի։
Արարողության ընթացքում ներկայացվեց նաև Լրագրողների միջազգային կենտրոնի՝ «Ավրորա» մրցանակի հետ համագործակցությամբ սահմանված «Սկզբունքային լրագրության» նոր մրցանակը, որը նախատեսված է հումանիտար ճգնաժամերի վրա մարդկության ուշադրությունը հրավիրելու գործին նվիրում ցուցաբերած լրագրողների համար։ Մրցանակը հանձնվեց The New York Times թերթի թղթակից Ռուկմինի Կալիմաչիին՝ մարդկայնության դեմ իրականացվող ոճիրների բացահայտման գործում ցուցաբերած բացառիկ ներդրման համար։
«Ավրորա» մրցանակը հիմնադրվել է 100 LIVES համաշխարհային նախաձեռնության կողմից։ Այն մեկնարկել է անցյալ տարի՝ նպատակ ունենալով երախտագիտություն հայտնել բոլոր նրանց, ովքեր հարյուր տարի առաջ՝ Հայոց ցեղասպանության տարիներին, օգնել են հայությանը գոյատեւել։ 100 LIVES-ը մեծարման է արժանացնում մարդկային ոգու տոկունությունը՝ ճանաչում շնորհելով այն անհատներին ու կազմակերպություններին, որոնք մեր օրերում ցուցաբերում են անձնազոհության միեւնույն ոգին՝ օգնելով այլոց գոյատեւել և հասնել բարօրության։
