ԵՐԵՎԱՆ, 26 ապրիլի — Sputnik. Երեկ երեկոյան Երևանի Հալաբյան փողոցում տեղի ունեցած պայթյունից հետո տեղեկություն տարածվեց, որ Նոր Նորք վարչական շրջանից Աջափնյակ վարչական շրջան երթուղին սպասարկող 63 համարի ավտոբուսը պատկանում է «Քինգ դե լյուքս» ընկերությունը։ Երևանի քաղաքապետարանի տրանսպորտի վարչության պետ Հենրիկ Նավասարդյանը Sputnik Արմենիա ռադիոկայանի եթերում հայտնեց, որ այդ տեղեկությունը չի համապատասխանում իրականությանը։
«Սա այն կազմակերպությունը չէ, որի մասին գրում են լրատվամիջոցները։ Սա տարբերվում է այն ընկերությունից, որի մասին խոսում են: Դրանք տարբեր ՍՊԸ-ներ են», —ասաց վարչության պետը։
Հենրիկ Նավասարդյանն անդրադարձավ նաև ավտոբուսի տեխնիկական վիճակին և նշեց, որ պայթյունը տեխնիկական վիճակի հետ ոչ մի կապ չունի։
«Մեքենան երթուղի է դուրս եկել նորմալ վիճակում, պայթյունը տեղի է ունեցել վերջին երթի ժամանակ։ Այլ մանրամասներ չեմ կարող հայտնել»,- նշեց Նավասարդյանը։
Երևանում մարդատար ավտոբուսի պայթյունի հետևանքով զոհվել է 2 մարդ։ Նրանց անունները դեռ չեն հրապարակվում։ Ապրիլի 25-ի երեկոյան Երևանում ուղևորատար ավտոբուսում տեղի ունեցած պայթյունի փաստի կապակցությամբ քրեական գործ է հարուցվել։
Ըստ նախնական վարկածի` ավտոբուսը պայթել է ընթացքի մեջ։ Պայթյունը հնչել է ավտոբուսի աջակողմյան հատվածում, երկրորդ նստարանի մոտից։ Իրավապահները փորձում են պարզել այն անձի ինքնությունը, որը ենթադրաբար նստած է եղել այդ նստարանին։
