ԵՐԵՎԱՆ, 25 ապրիլի — Sputnik. Արծրուն Հովհաննիսյանը հորդորեց` ծառայությունից խուսափած ու այստեղ-այնտեղ իր «քաջագործությամբ» հպարտացող քաղաքացուն պետք է միջավայրում պահել ցածր դիրքերում։
«Ինչպես ուզում եք, արեք` կհայհոյեք, կպարսավեք, աղջիկ չեք տա… Բայց աշխատեք, որ չծառայած տղերքը ձեր միջավայրում իրենց ավելի ցածր, ավելի թույլ զգան։ Ես ունեմ չծառայած ընկերներ, նրանք շփման կոմպլեքս ունեն»,-ասաց նա` ավելացնելով, որ խոսքը բնականաբար չի վերաբերում այն տղաներին, ովքեր չեն զինակոչվում հարգելի պատճառներով։
Հովհաննիսյանն առաջարկ ունի բոլոր նրանց, ովքեր խոսում են զինծառայությունից խուսափողների մասին` կոնկրետ ցուցակներ ներկայացրեք։
«ՊՆ-ն անկախ նրանից, թե ինչ է ստիպված անել, ինչ-ինչ հանգամանքներից ելնելով, միշտ շահագրգիռ է, որ բոլորին տանի բանակ»,-ասաց Հովհաննիսյանը։
Նրա խոսքով` բանակին կարելի է մեղադրել միայն այն դեպքում, երբ անձը զորակոչային տարիքում է, հաշվառված է, բայց բանակ չի գնացել։
