ԵՐԵՎԱՆ, 25 ապրիլի — Sputnik. Հույն ֆոտոլրագրող Գիորգոս Մութաֆիսին շաբաթ երեկոյան թույլ չեն տվել մուտք գործել Թուրքիա:Մութաֆիսը գնացել է Ստամբուլ և կիրակի առավոտյան պետք է Bild գերմանական տաբլոիդի պատվերով թռչեր Լիբիա, սակայն Լիբիայի փոխարեն նա ստիպված է եղել վերադառնալ Աթենք:
«Անձնագրային հսկողության ծառայությունում ինձ ասացին, որ իմ անունն ինչ-որ ցանկում է, և ես չեմ կարող մտնել Թուրքիա: Այդ ժամանակ մինչև առավոտ վերցրին իմ անձնագիրը, և գիշերը ստիպված եղա մնալ օդանավակայանի սրահներից մեկում: Ինձ չասացին, թե ինչ պատճառներով է իմ անունն այդ ցանկում»,- ասել է լուսանկարիչը: Նշվում է, որ Մութաֆիսը հայտնի լուսանկարիչ և լրագրող է, վերջին տարիներին նա հայտնի է փախստականների մասին իր գործերով, վերջին ամիսները նա անցկացրել է հունական Լեսբոս կղզում։ Մութաֆիսն աշխատել է նաև Reuters գործակալության, Time, Newsweek ամսագրերի, Al Jazeera և CNN հեռուստաալիքների համար: 2014 թվականին նա եղել է Սիրիայում և Իրաքում:
Ավելի վաղ Թուրքիան թույլ չի տվել երկիր մուտք գործել գերմանական ARD հեռուստաընկերության աշխատակից Ֆոլկեր Շվենկին՝ «անվտանգության նկատառումներով»: Բացի այդ, Նիդեռլանդների ԱԳՆ-ն հաստատել է, որ կիրակի օրը ձերբակալվել է թուրքական ծագումով հոլանդացի լրագրող Էմբրու Ումարը՝ Twitter սոցցանցում Թուրքիայի նախագահի մասին քննադատական հաղորդագրություններից հետո։
