ԵՐԵՎԱՆ, 24 ապրիլի – Sputnik. Հայ զինծառայող Սևակ Շահին Բալըքչըի ծնողները պնդում են, որ իրենց որդին սպանվել է հայ լինելու պատճառով և սպանության ամսաթիվը՝ ապրիլի 24-ը, պատահական չէր ընտրվել: Նրա մայրը՝ Անի Բալըքչըն, բազմիցս նշել է, որ Թուրքիայում իր օտար լինելը զգացել է այն պահին, երբ որդուն սպանողին ազատազրկել են ընդամենը 4 տարի 5 ամիս ժամկետով: Սևակի մոր խոսքով` Սևակը ծառայությունից առաջ հայկական ինքնության պատճառով խնդիրներ չի ունեցել, և իրենք նրան ծառայության ուղարկելիս չեն վախեցել:
Սևակի ծնողները պատմել են ծառայության ընթացքում իրենց տղայի հանդեպ եղած բացասական վերաբերմունքի, բռնության դեպքերի մասին: Հայրը՝ Կարպիս Բալըքչըն, սկզբում հավատացել է դժբախտ պատահար լինելու վարկածին, քանի դեռ իր աչքով չի տեսել սպանության վայրը:
«Այդ օրը նաև Զատիկ էր: Զուգադիպել էր, 96 տարի անց այդ երկու առիթները համընկել էին: Սևակը հայ էր, որ սպանվեց ապրիլի 24-ին: Նա հարմար վայրում էր հայտնվել»,- մի առիթով ասել է տղայի մայրը՝ մնալով իր համոզմունքին, որ այդ օրը պետք է մի հայ սպանվեր՝ մյուսների աչքը վախեցնելու համար:
