Հայոց ցեղասպանության զոհ դարձած Քոսեյան գերդաստանի` աշխարհում սփռված սերունդները տարին մեկ անգամ հանդիպում են Հայաստանում, այցելում Ցեղասպանության զոհերի հուշահամալիր ու վերհիշում թուքական յաթաղանից փրկված նախնիների պատմությունը
Խարբերդցի Քոսեյանների 64 հոգանոց գերդաստանից Հայոց ցեղասպանության ժամանակ փրկվել են միայն երկուսը` քույր ու եղբայր։ Թուրք հրոսակներից փախած 9 և 11 տարեկան երեխաներին փրկել են քրդերը, թաքցրել, պահել, մեծացրել ու պատմել նրանց գերդաստանի ողբերգական պատմությունը։
«Քրդերը պապիկիս հորն ու նրա քրոջը տարել են հայերի մոտ, որտեղ նրանք վերագտել են իրենց ազգությունը, ամուսնացել հայի հետ ու հայկական ընտանիքներ կազմել»,- Sputnik Արմենիային պատմեց Հոսնի Քոսեյանը։
Քոսեյանների սերունդներն այսօր ապրում են Գերմանիայում, Շվեդիայում, արդեն նաև`Հայաստանում։ Հոսնի Քոսեյանն 8 տարի առաջ ընտանիքով տեղափոխվել է Հայաստան, և արդեն 8-րդ տարին է, ինչ ամեն տարի ապրիլի 24-ին հայրենիքում հյուրընկալում է եվրոպայից ժամանող հարազատներին։
Հոսնի Քոսեյանը խոստովանում է` Հայաստանում նոր կյանք սկսելն ու ապրելը հեշտ չէ, բայց այստեղից հեռանալու մասին մտածել անգամ չի ուզում։
«Շատ հեշտ է ամեն ինչից բողոքելն ու ուրիշներին մեղադրելը, բայց մենք պետք է մեզանից սկսենք մեր երկրի կառուցումը»,- ասում է նա ու ավելացնում` աշխարհում կատարյալ երկիր չկա, կատարյալ երկիրը կառուցում են նրա բնակիչները։
