ԵՐԵՎԱՆ, 24 ապրիլի — Sputnik. Այսօր` ապրիլի 24-ին, Թուրքիայում ապրիլքսանչորսյան ոգեկոչումները մեկնարկեցին առավոտյան, Ստամբուլի Գումգափի շրջանում գտնվող Պոլսո աթոռանիստ մայր եկեղեցում, որտեղ սուրբ պատարագ մատուցեց Թուրքիայի հայոց պատրիարքական ընդհանուր փոխանորդ Արամ արքեպիսկոպոս Աթեշյանը:
«Թեև հայտարարված էր, որ այսօր նահատակների հիշատակին պատարագ պիտի մատուցվի, այնուհանդերձ Թուրքիայում պետական մասշտաբով այլ միջոցառումներ էին կազմակերպվել, օրինակ` հեծանիվի ու վազքի մարաթոններ, որոնց պատճառով Ստամբուլի հայաբնակ Գումգափի թաղամաս տանող ճանապարհների մեծ մասը փակ էին, և ժողովրդի համար արհեստական դժվարություններ էին ստեղծվել եկեղեցի հասնելու համար»,- Sputnik Արմենիայի եթերում ասաց «Մարմարա» օրաթերթի լրագրող Նաիրա Մկրտչյանը։
Նրա խոսքով` ճանապարհների փակ լինելն էր պատճառը, որ թեև Մայր եկեղեցի մտնելու համար անվտանգության շատ խիստ միջոցառումներ էին իրականացվում, այնուհանդերձ ակնկալվածի չափ բազմություն չկար։
Պատարագին մասնակցում էին նաև Թուրքիայի մեջլիսի հայ պատգամավորները` Արդարություն և զարգացում (AKP) կուսակցությունից Մարգար Եսայանը, ընդդիմադիր Ժողովրդա-հանրապետական (CHP) կուսակցությունից Սելինա Դողանը, քրդական Ժողովուրդների դեմոկրատական (HDP) կուսակցությունից՝ Գարո Փայլանը։ Ներկա էին նաև Սևծովյան տնտեսական համագործակցության հայաստանյան ներկայացուցիչներ Արսեն Ավագյանը և Սամսոն Օզարարատը, ինչպես նաև` մի շարք բարերարներ, որոնք բոլորն էլ եկել էին հարգանքի տուրք մատուցելու 1915 թվականի զոհերի հիշատակին։
Նաիրա Մկրտչյանը պատմեց, որ հայկական եկեղեցում մատուցված պատարագի ընթացքում Արամ արքեպիսկոպոս Աթեշյանն անդրադարձել է այն փաստին, որ Թուրքիայի նախագահ Ռեջեփ Թայիփ Էրդողանն ապրիլի 24-ի կապակցությամբ ցավակցական ուղերձ է հղել Պոլսի Հայոց պատրիարքարանին և ցավակցություն հայտնել 1915 թվականի դեպքերի կապակցությամբ։ Արամ արքեպիսկոպոսը շնորհակալություն է հայտնել այդ ուղերձի համար, սակայն միաժամանակ նշել է այն խոչընդոտները, որոնց պատճառով սպասումները չեն իրականացել և մեծ թվով հայեր չեն կարողացել մասնակցել հայկական եկեղեցում նախատեսված հավաքին։
Ապրիլի 24-ին, երեկոյան 19։00-ին Թաքսիմի հրապարակում դարձյալ ցույց է նախատեսված։ Թե այդ ցույցը խոչընդոտելու համար ինչ միջոցառումներ կձեռնարկի թուրքական իշխանությունը, առայժմ հայտնի չէ։
