ԵՐԵՎԱՆ, 24 ապրիլի — Sputnik. Եզդիների համայնքի ներկայացուցիչները կմեկնեն Ղարաբաղ, եթե Ադրբեջանը նոր ագրեսիա սանձազերծի, ասաց Հայաստանի եզդիների միության նախագահ Ազիզ Թամոյանը։
«Ղարաբաղյան պատերազմի ժամանակ ես անձամբ հինգ եզդիների էի ղեկավարում։ Աստված չանի, եթե պետք լինի, կրկին կմասնակցենք պատերազմի»,- ասաց Թամոյանը։
Նա նշեց, որ եզդի ժողովուրդը պետք է կանգնած լինի հայ ժողովրդի կողքին։ Որոշ երիտասարդներ այժմ սահմանում են, իսկ մյուսներն էլ պատրաստ են նրանց միանալ անհրաժեշտության դեպքում։
«Մենք (եզդիները) վերջին ամիսների ընթացքում հինգ երիտասարդ ենք կորցրել, նրանք ծառայում էին հայկական ուժերի կազմում և պաշտպանում հայկական հողը»,- նշեց Թամոյանը։
Նրա խոսքով` Ղարաբաղն ինքնորոշվել ու ԽՍՀՄ-ից անջատվել է այնպես, ինչպես Հայաստանն ու Ադրբեջանը։
«Պետություններն ինքնորոշվել են և առանձնացել ԽՍՀՄ-ից, արդյո՞ք դա չի համապատասխանում միջազգային չափանիշներին։ Այստեղ որևէ խախտում չի եղել»,- ասաց Թամոյանը։
Նրա կարծիքով` աշխարհի առաջադեմ պետություններն ու ժողովուրդները պետք է դատապարտեն Ադրբեջանի իշխանությանը, իսկ Ղարաբաղի նկատմամբ իրագործված հանցագործությունները պետք է մինչև Միջազգային դատարան հասնեն։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
