ԵՐԵՎԱՆ, 24 ապրիլի — Sputnik. Լեռնային Ղարաբաղը ներգրավված է որպես կողմ, և 1994թ.-ին ստորագրված հրադադարի մասին պայմանագիրը այսօր էլ է գործում, ասաց Սեյրան Օհանյանը:
«Պարզապես այն, ինչ ձեռք է բերվել մարտական գործողությունները կանգնեցնելու համար, ձեռք է բերվել համապատասխան միջնորդությամբ, որին մասնակցել է նաև ՀՀ Զինված ուժերի գլխավոր շտաբը»,- ասաց պաշտպանության նախարարը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։
Ապրիլի 5-ին Մոսկվայում պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը պարբերաբար խախտվում է։ Պայմանավորվածության նախաձեռնողը եղել է ադրբեջանական կողմը, որը համապատասխան միջնորդությամբ դիմել էր Ռուսաստանի իշխանություններին:
