ԵՐԵՎԱՆ, 24 ապրիլի — Sputnik. ՀՀ պաշտպանության նախարար Սեյրան Օհանյանի խոսքով` Լեռնային Ղարաբաղի և Ադրբեջանի շփման գծում իրավիճակն այժմ հանգիստ է:
«Հիմնականում այս օրերին և հիշարժան օրերին ադրբեջանական կողմը բարձրացնում է լարվածության աստիճանը, թույլ տալիս հրադադարի ռեժիմի խախտումներ: Հակառակորդն այդպիսով փորձում է մեր զգոնությունը ստուգել: Լարվածությունն արտահայտվել է շփման գծի հյուսիսարևելյան և հյուսիսային ուղղություններով խոշոր տրամաչափի ականանետների կիրառմամբ: Այս գիշեր որոշակի լարվածություն եղել է, սակայն այժմ իրավիճակը ՊԲ հրամանատարության կողմից վերահսկելի է: Անձնակազմն իր տեղում է, անվտանգ է, ապահով է ու իրականացնում է իր առջև դրված խնդիրները»,- ասաց ՀՀ պաշտպանության նախարարը:
ԼՂՀ ՊՆ մամուլի ծառայության հայտարարության համաձայն` ապրիլի 23-ի կեսօրից ղարաբաղա-ադրբեջանական հակամարտ զորքերի շփման գոտում սկսված հակառակորդի հրետանային նախահարձակ ակտիվությունը շարունակվել է նաև ապրիլի լույս 24-ի գիշերը:
Նշված ժամանակահատվածում շփման գծի հյուսիսարևելյան (Մարտակերտ) և հյուսիսային (Թալիշ) ուղղություններով ադրբեջանական զինուժը տարբեր տրամաչափի հրաձգային զինատեսակներից, 60 (16 արկ), 82 (99 արկ) միլիմետրանոց ականանետներից, 122 միլիմետրանոց Դ-30 հաուբից տիպի հրանոթներից (19 արկ) և TR-107 տիպի համազարկային հրթիռային կայանքներից (25 արկ) ինտենսիվ կրակ է վարել պաշտպանության բանակի դիրքապահների ուղղությամբ:
