ԵՐԵՎԱՆ, 23 ապրիլի- Sputnik. Երևանի քաղաքապետ Տարոն Մարգարյանի հանձնարարությամբ` Հայոց ցեղասպանության 101-րդ տարելիցին ընդառաջ քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանն ավանդույթի համաձայն այցելեց Ցեղասպանությունը վերապրած երևանաբնակներին, հաղորդում է Երևանի քաղաքապետարանի տեղեկատվության և հասարակայնության հետ կապերի վարչությունը:
Նրանց թիվը, ցավոք, տարեցտարի նվազում է, և այսօր մայրաքաղաքում բնակվում է ցեղասպանությունը վերապրած 3 մարդ՝ Սիլվարդ Ատաջյանը, Անդրանիկ Մաթևոսյանը, Մարգարիտա Մխիթարյանը:
«Ամեն տարի ավանդույթի համաձայն մենք այցելում ենք Մեծ եղեռնը վերապրած մեր համաքաղաքացիներին, բայց նշեմ նաև, որ նրանք մեր մշտական ուշադրության կենտրոնում են, և մշտապես փորձում ենք ըստ ամենայնի աջակցել նրանց», — նշել է Ռուզաննա Զաքարյանը:
Ցեղասպանությունը վերապրած երևանաբնակների հարազատները շնորհակալություն են հայտնել ցուցաբերվող մշտական ուշադրության և հոգատար վերաբերմունքի համար:
XIX դարի վերջի XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
