ԵՐԵՎԱՆ, 22 ապրիլի- Sputnik. «Ընդդեմ ցեղասպանության հանցագործության» համաժողովի շրջանակում կհայտարարվի «Հումանիտար ինդեքս» նոր նախագծի ստեղծման մասին, ասաց 100 LIVES և Aurora Prize նախագծերի ղեկավար Արման Ջիլավյանը։
Ջիլավյանը շնորհակալություն հայտնեց համաժողովի կազմակերպիչներին` սերտ համագործակցության համար և նշեց դրա շրջանակում «Aurora dialogs»-ի անցկացման կարևորությունը։
«Առաջին անգամ այդ միջոցառման ընթացքում կներկայացվի նոր նախագիծ` «հումանիտար ինդեքս», որը կփորձի ներկայացնել աշխարհի տարբեր երկրներում առավել հետաքրքիր հումանիտար թեմաները։ Կանցկացվի նաև ուսումնասիրություն, թե որքանով ճիշտ կամ սխալ է ընկալում հասարակությունն այդ թեմաները»,- ասաց Ջիլավյանը։
Նրա խոսքով` շատ կարևոր է, որ նման նախաձեռնությունը բխում է Հայաստանից։
Նա նշել է, որ Aurora Prize-ի հյուրերը շարունակում են ժամանել Երևան, նրանց մեծ մասն արդեն Հայաստանում է։ Ոմանք արդեն հասցրել են այցելել Էջմիածին, Գեղարդ և այլ տեսարժան վայրեր։
«Ավրորա» մրցանակը կհանձնվի 2016թ.-ի ապրիլի 24-ին Երևանում։ Մրցանակը կհանձնի հայտնի հոլիվուդյան դերասան Ջորջ Քլունին։
Aurora Prize-ը հիմնել են 100 LIVES նախաձեռնության հիմնադիրները՝ որպես երախտագիտություն նրանց, ովքեր Հայոց ցեղասպանության տարիներին փրկության ձեռք մեկնեցին հայերին:
Ամենամյա այս մրցանակը ստեղծվել է մարդկության ուշադրությունը ևս մեկ անգամ ուղղելու աշխարհում այսօր տեղի ունեցող աղետներին ու ոճրագործություններին և խրախուսելու այն հերոսների ջանքերը, որոնք մարդկային կյանքեր են փրկում:
