ԵՐԵՎԱՆ, 22 ապրիլի — Sputnik. ՌԴ արտաքին գործերի նախարար Սերգեյ Լավրովի հետ համատեղ ասուլիսի ժամանակ ՀՀ արտաքին գործերի նախարար Էդվարդ Նալբանդյանը պատասխանեց այն հարցին, թե որտե՞ղ էր ապրիլի 2-ից սկսված լարված օրերին։
«Եթե այդ քննադատները կարծում են, որ բոլոր քայլերի մասին, ինչ անում է արտգործնախարարությունը,պետք է մենք հրապարակենք, ապա հեռու են դիվանագիտության աշխատանքի բնույթի ընկալումից։ Այստեղ գաղտնիի կամ ոչ գաղտնիի մասին չէ, այլ՝ արդյունավետ աշխատանքի»,- ասաց Նալբանդյանը։
Նա խորհուրդ տվեց նայել ԱԳ նախարարության կայքէջը, որտեղ հրապարակված է, թե ՀՀ արտգործնախարարն այդ օրերին որտեղ է եղել։
«Իրադարձություններից առաջ, ընթացքում, հետո՝ ես Ժնևում էի, 31-ին միացա Վաշինգտոնում ՀՀ նախագահ գլխավորած պատվիրակությանը, ամսի 3-ին ընդունում էի պատվիրակություններ, 4-ին Փարիզում Ֆրանկոֆոնիայի շրջանակներում համապատասխան փաստաթղթեր ստորագրում, 5-7-ին՝ Բեռլինում էի, նախագահի հետ, պաշտոնական այցելության, 8-ին Մոսկվայում հանդիպում է Լավրովի ու Բորդյուժայի հետ, մասնակցում ԱՊՀ հանդիպմանը, 9-ին ընդունում էի եռանախագահներին, հետո ՄԱԿ-ի գլխավոր քարտուղարի տեղակալին և այլն»,- ասաց Նալբանդյանը։
Նրա խոսքով` եղել են տասնյակ հեռախոսազրույցներ՝ նվիրված այս ճգնաժամին, առաջին վայրկյաններից, երբ ագրեսիան սանձազերծվեց, կապը հաստատվել էր Լավրովի հետ և այլն։
«Եվ սա միայն ԱԳ նախարարի մասով։ Բայց մեծ ծավալի աշխատանք են կատարում մեր դիվանագետները։ Այնպես որ կառուցողական քննադատություններին մենք լրջորեն ենք մոտենում, փորձում ենք շտկել բացթողումները, բայց այն, ինչ մեջբերվում է, շինծու է, սին»,- ասաց Էդվարդ Նալբանդյանը։
